बाँकेको पर्यटकीय क्षेत्र गाभरमा भोलि शनिवार प्रदेश स्तरिय साइकल दौड प्रतियोगिता गरिने भएको छ ।
बाँके जिल्ला साइक्लिङ संघले पहिलो पटक यसरी प्रदेश स्तरिय साइकल दौड प्रतियोगिता आगोजना गर्न लागेको हो ।
विहिबार पत्रकार सम्मेलनको आयोजना गर्दै आयोजक बाँके जिल्ला साइक्लिङ संघका अध्यक्ष गगन थापाले साइकल खेलको प्रतियोगितात्मक आवश्यकता तथा महत्वका बारेमा जानकारी दिए ।
अध्यक्ष थापाले पर्यटकीय क्षेत्रको प्रसार प्रचारसँगै साइकल खेल प्रति रुचि बढाउन प्रतियोगिताको आयोजना गरिएको बताए । लुम्बिनी प्रदेश स्तरिय एमटीभी च्यालेन्ज २०२३ नाममा हुने आयोजना रोमाञ्चक हुने आयोजकको भनाइ छ ।
शनिबार विहान ७ बजे हुने खेलमा १८ जना खेलाडीले सहभागिता जनाउने लुम्बिनी प्रदेश स्तरिय एमटीभी च्यालेन्ज २०२३ का संयोजक कविराम बुढाथोकीले जानकारी दिए । प्रतियोगितामा बाँके सहित दाङ र रुपन्देहीबाट खेलाडीहरुले सहभागिता जनाउने भएका हुन् ।
संयोजक बुढाथोकीका अनुसार, ७ जना महिला खेलाडी सहित १८ जनाले भाग लिने तय एमटीभी च्यालेन्ज चार किलोमिटरको दुरीमा रहेको ट्रयाकमा हुनेछ ।
साइकल दौड प्रतियोगिता संचालन गरिने ट्रेलको मर्मत कार्य पनि भैसकेको आयोजक बाँके जिल्ला साइक्लिङ संघका अध्यक्ष थापाले जानकारी दिएका छन् ।
गाभर सामुदायिक होम स्टेका अध्यक्ष कृष्णलाल चौधरीले साइकल ट्रेल जंगलभित्र रहेकाले एक किसिमको च्यालेन्ज महसुस हुने बताए । खेलाडीलाई समस्या हुन नदिन प्रतियोगितामा समन्वय गरिरहेको पनि चौधरीको भनाइ छ ।
नेपालमा अहिले साइक्लिङका ४ विधामा खेलहरु खेलाइने भएपनि संघले आयोजना गरेको प्रदेश स्तरिय खेलमा एक्ससिओ फर्मेटमा पहिलो पटक खेलाउन थालिएको संघले पत्रकार सम्मेलनमा जानकारी दिएको छ ।
प्रतियोगितामा भाग लिन आउने खेलाडीहरु एक दिन अघि नै खेल हुने स्थानमा पुगिसक्ने र ट्रयाकमा आफ्नो साइकल परिक्षण गर्ने गरि तयारी गरिएको आयोजकले जनाएको छ । त्यसका लागि पर्यटकीय क्षेत्र गाभरले आयोजनालाई आतिथ्यता गर्दैछ ।
पत्रकार सम्मेलनमा प्रदेश खेलकुद परिषद्का सदस्य नरेन्द्र थापा, केन्द्रीय साइकल संघका कमिसार शैलेन्द्र डंगोलले आफ््ना धारणासँगै सम्बन्धित विषयमा कुरा राखेका थिए । प्रतियोगिताको प्राविधिक नेतृत्व गरिरहेका कमिसार डंगोलले गाभरको ट्रेललाई खुलेर प्रशंसा गरे । आठौं राष्ट्रिय खेलकुद प्रतियोगिातका क्रममा बनाइएको उक्त ट्रेल निकै रोमाञ्चक रहेकाले खेलाडीहरुले प्रतिष्पर्धासँगै साहसिक रोमान्स अनुभूत गर्ने बताए ।
