नेपालगन्जको धम्बोझी चोकमा राजपा नेपालले आयोजना गरेको बन्दका क्रममा मोटसाइकल तोडफोड गर्ने एक जनालाई प्रहरीले पक्राउ गरेको छ ।
बिरामीलाई अस्पताल लैजाँदै गएका एक व्यक्तिको मोटरसाइकलमा लाठी प्रहार गर्ने जयसपुरका मेराज अन्सारीलाई प्रहरीले पक्राउ गरेको हो ।
बन्दका क्रममा धम्बोझीको बीच सडकमा टेन्ट लगाउन खोज्ने आन्दोलनकारीलाई प्रहरीले रोकेको छ । सडकमा टेन्ट नलगाउन प्रहरीले चेतावनी दिएपछि आन्दोलनकारीले हटाएका थिए ।
बजार क्षेत्रमा बन्दको प्रभाव सामान्य रहेको छ । पसल, व्यवसाय सञ्चालनमा रहेपनि ग्राहकहरुको उपस्थिति न्यून रहेको व्यवसायीहरुले बताएका छन् । बन्दकर्ताले धम्बोझी चोकमा अवरोध गरेपनि नेपालगन्जका अन्य ठाउँमा निर्वाध रुपमा यातायात सञ्चालनमा रहेको छ ।
