धम्बोझी क्लब जिल्ला ‘ए’ डिभिजन लिग फुटबल च्याम्पियन

धम्बोझी क्लब नेपालगन्जले लगातार दोस्रो पटक बाँके जिल्ला ‘ए’ डिभिजन लिग फुटबल प्रतियोगिता– २०८१ को उपाधि जितेको छ ।


बिहिबार कोहलपुर स्थित १३ विगाहा फुटबल मैदानमा भएको फाइनल खेलमा धम्बोझीले कोहलपुर रेसिङ सहारा क्लबलाई २–० ले हराउँदैं च्याम्पियन बनेको हो । जितसँगै धम्बोझी लुम्बिनी प्रदेश स्तरीय लिग फुटबलमा बाँके जिल्लाको प्रतिनिधित्व गर्नेछ ।


धम्बोझीको जितमा क्षितिज थापा मगर र मनिष सुनारले १–१ गोल गरे । क्षितिजले खेलको १२औं मिनेट र मनिषले ६५औं मिनेटमा गोल गरेका थिए । फाइनलमा खेलमा प्लेयर अफ द म्याच धम्बोझीका क्षितिज थापामगर भए । उनलाई महिला उद्यमी संघ नेपाल बाँके सचिव नितु चन्दले ट्रफी प्रदान गरिन् ।


च्याम्पियन बनेको धम्बोझीले १ लाख र उपविजेता कोहलपुर रेसिङ सहारा क्लबका खेलाडीहरुले ५१ हजार रुपैयाँ नगद पुरस्कार, ट्रफी, मेडल प्रमाण पत्र प्राप्त गरेको छन् । बिहिबार विजेता तथा उप विजेता खेलाडीहरुलाई प्रमुख अथिती कोहलपुर नगरपालिका नगर प्रमुख पुर्णप्रसाद आचार्य, आयोजक बाँके जिल्ला फुटबल संघका अध्यक्ष एवम एन्फा सदस्य भोजराज शाही, राष्ट्रिय खेलकुद परिषदका सदस्य दिपेन्द्र विष्ट, एन्फा पुर्व उपाध्यक्ष गोर्वधन सिंह सम्झना, लुम्बिनी प्रदेश खेलकुद परिषदका सदस्य जनक केसी, नेपाल पत्रकार महासंघ बाँकेका पूर्व अध्यक्ष निरज गौतम लगायतले पुरस्कृत गर्नु भएको थियो ।

बाँके जिल्ला फुटबल संघले आयोजना गरेको प्रतियोगितामा धम्बोझीका क्षितिज थापामगर सर्वोत्कृष्ट खेलाडीको रुपमा पुरस्कृत भए । यसैगरी प्रतियोगितामा कोहलपुर रेसिङका सालान परियार उत्कृष्ट गोलकिपर, धम्बोझीका विष्णु कसेरा उत्कृष्ट रक्षक, कोहलपुर रेसिङका विशाल थापामगर उत्कृष्ट मिडफिल्डर, धम्बोझीका प्रेम कुमार सुनार सर्वाधिक गोलकर्ता र उत्कृष्ट प्रशिक्षकको रुपमा धम्बोझीका दिपेन्द्र घले पुरस्कृत भए ।


असार १ गते देखि सुरु भएको प्रतियोगितामा यसपटक बाँके जिल्लामा आवद्ध भएका ९ वटा क्लबले भाग लिएका थिए । प्रतियोगिताको समुह ‘ए’ मा कोहलपुर रेसिङ सहारा क्लब, धम्बोझी क्लब, नवदुर्गा युवा क्लब, कारकादो युवा स्पोर्टस् क्लब, मिलन युवा स्पोर्टस क्लब रहेका थिए । समुह ‘बी’मा न्यु डाँफे स्पोर्टस् क्लब, जय किसान स्पोर्टस् क्लब, रोयल नेपालगन्ज एफसी र ओसोनिक क्लब रहेका थिए ।

प्रतिक्रिया

प्रतिक्रिया