यतिबेला मुलुकको प्रमुख प्रतिपक्ष दल, नेकपा एमाले देशभर ‘ग्रासरुट’ अभियानमा छ । त्यसक्रममा एमाले बाँकेले नेपालगन्जका दुई वटा वडामा शनिवार निःशुल्क छाला रोग परीक्षण स्वास्थ्य शिविर सञ्चालन गरेको जनाएको छ ।
‘जनतासँग प्रत्यक्ष जोडिने गरि थालिएको ग्रासरुट अभियानका क्रममा जनताको स्वास्थ्य समस्या समाधानका लागि सानो प्रयास गरिएको’ स्वास्थ्य शिविर शुभारम्भ गर्दै एमाले बाँकेका अध्यक्ष किस्मत कुमार कक्षपतिले भने । उनका अनुसार, पार्टीले सञ्चालन गरेको ग्रासरुट अभियानको क्रममा नेपालगन्जको वडा नं २१ र २३ मा निःशुल्क छाला रोग परीक्षण स्वास्थ्य शिविर सञ्चालन गरेको हो ।
अध्यक्ष कक्षपतिले ग्रासरुट अभियानमा टोलटोलमा पुग्दा धेरैमा छाला रोगको समस्या देखिएपछि राष्ट्रिय स्वास्थ्यकर्मी महासङ्घको सहकार्यमा छाला रोग सम्बन्धि शिविर चलाइएको बताए।
नेपालगन्जको पिछाडिएको वडा मानिने वडा नं २३ को जंगलीसिंहपुरुवास्थित नेराप्राविमा शिविर सञ्चालन गरिएको थियो । एमालेका नेता बाबुराम गौतम, जिल्ला अध्यक्ष कक्षपति, उक्त वडाका ग्रासरुट अभियानका संयोजक खिलप्रसाद भुसालले शिविरको उद्घाटन गरे ।
‘ग्रासरुट अभियान जनतासँग पार्टी अभियानलाई जोड्ने पुल हो,’ एमाले बाँकेका अध्यक्ष कक्षपतिले भने, ‘जनताको स्वास्थ्य उपचारदेखि खेतबारीमा कामका लागि अर्मपर्मसम्मका योजना बनाएर परिचालित छौं ।’ उनले एमाले राजनीतिमात्रै गर्दैन, जनताका लागि राजनीति गर्छ भन्ने कुरा गाउँतहसम्म पु¥याइरहेको दावी गरे ।
भेरी अस्पताल नेपालगन्जका छाला रोग विशेषज्ञ डा. अनिषा उप्रेती नेतृत्वको टोलीले गरेको स्वास्थ्य परीक्षणमा अधिकाँशमा लुतो, चिलाउने,दाद, खुट्टा फाटेका जस्ता समस्या देखिएका थिए ।
एमालेसम्बद्ध राष्ट्रिय स्वास्थ्यकर्मी महासंघको सहकार्यमा शिविर सञ्चालन गरिएको हो । महासंघ बाँकेका अध्यक्ष राजन शाहीका अनुसार, शिविरमा १८० जनाको स्वास्थ्य परीक्षण भएको छ ।
