समाचारदाता
दैनिक नेपालगन्ज
नेपालगन्ज आइपुगेका पूर्व राजा ज्ञानेन्द्र शाहको जन्मोत्सव भव्य रुपमा मनाउने तयारी गरिएको छ । बुधवार साँझ परिवारका अन्य सदस्य सहित नेपालगन्ज पुगेका पूर्वराजाको जन्मदिन मनाउन नेपालगन्जमा समिति समेत बनाइएको छ ।
असार २३ गते पूर्व राजाको जन्मोत्सवको अवसरमा परिवारका सबै सदस्य साँझ काठमाडौबाट नेपालगन्ज आएको राप्रपाका नेता ऋषिराज देवकोटाले दैनिक नेपालगन्ज सँग भने, ‘जन्मोत्सव लगायत कार्यक्रमका लागि औपचारिक समिति पनि गठन गरिएको छ ।’ नेपालगन्जमा पूर्व राजा ज्ञानेन्द्रको जन्मोत्सव औपचारिक रुपमै मनाउने कार्यक्रम छ । आगामी शनिबार आफ्नो जन्मोत्सव नागरिक स्तरमै मनाउने भएपछि पूर्व राजा ज्ञानेन्द्रले नेपालगन्जलाई प्राथमिकतामा राखेका हुन् ।
निर्धारित कार्यक्रम ब्यवस्थापन र स्वागत लगायत कार्यका लागि जन्मोत्सव नागरिक मूल समारोह समिति गठन गरिएको छ’, देवकोटाले भने । नेपालगन्ज–२ का भुवन कृष्ण श्रेष्ठको संयोजकत्वमा नागरिक मुल समारोह समिति गठन गरिएको हो । ‘पूर्वराजालाई विमानस्थलबाट नै भव्य स्वागत, सम्मान सहित होटेल सोल्टी प्लाजा सम्म ल्याइएको छ, देवकोटाले भने, ‘बाँकी कार्यक्रम होटेलमा नै आयोजना हुने तय भएको छ ।’
पूर्वराजाको ७२ औं जन्मोत्सव मनाउनका लागि नेपालगन्जमा बिभिन्न उपसमितिहरु समेत गठन गरिएको नागरिक मुल समारोह समितिका महासचिब भिम बहादुर शाहीले जानकारी दिएका छन् । सो दौरानको अवधि सम्म पूर्व राजा नेपालगन्जको होटल सोल्टीमा बस्ने भएका छन् । ‘त्यही जन्मोत्सव मनाइनेछ’, नागरिक मूल समारोह समितिले भनेको छ । त्यसक्रममा पूर्वराजा ज्ञानेन्द्रले राजनीतिक, धार्मिक र सामाजिक भेटघाट समेत गर्दैछन् ।
‘विशिष्ठ ब्यक्तिहरु संगको भेटघाट सामान्य रुपमा चल्छ नै’, देवकोटोले भने, ‘त्यस बाहेक कुनै विशेष कार्यक्रम छैन ।’ परिवारका सदस्यहरु बुहारी, पत्नी, नातिनी नाती लगायत दरबार अन्य कर्मचारीहरु सहितको टोली नेपालगन्ज आएको हो ।
