दैनिक नेपालगन्ज
पश्चिम नेपालकै आधुनिक सुविधा सम्पन्न क्यान्सर अस्पताल बाँकेको खजुरा बजार छेउमा नयाँ बर्षसँगै सञ्चालनमा आउने भएको छ ।
खजुरा स्थित सुशिल कोइराला क्यान्सर अस्पताल नयाँ बर्षको प्रारम्भ, आगामी बैशाख अन्तिम साता सञ्चालनमा आउने भएको हो । ‘त्यसका लागि आवश्यक सबै तयारीमा जुटेका छौं’, अस्पतालका अध्यक्ष किस्मत कुमार कक्षपतिले दैनिक नेपालगन्जसँग भने, ‘प्रधानमन्त्री स्वयंले अस्पताल सञ्चालनमा ढिलो गर्न नहुने गरी रुचि देखाउनु भएको छ ।’
संवाददाता पुग्दा अध्यक्ष कक्षपति र अस्पतालका कार्यकारी निर्देशक डा. विश्वराम पौडेल ओपिडि ब्लकमा बेडको व्यवस्थापन हेर्दै थिए । ‘ओपिडि ब्लकको काम लगभग सकिएको छ’, अध्यक्ष कक्षपतिले दैनिक नेपालगन्जसँग भने, ‘एक सय बेडको पूर्वाधार स्वीकृति पाएपनि सबै हिसाबले ५९ बेड तयार गरेर सेवा शुभारम्भ गरिनेछ ।’
स्तन क्यान्सर विशेषज्ञ समेत रहेका कार्यकारी निर्देशक डा. पौडेलले एक सय शैय्याको पूर्वाधार सबै सञ्चालनमा ल्याउन ८० चिकित्सकको दरबन्दी आवश्यक रहने जानकारी दिए । ‘त्यतिञ्जेल उपलब्ध जनशक्तिबाटै सेवा सुविधा प्रवाह गर्ने काम अगाडि बढाइने छ’, डा. पौडेलले भने, ‘कतिपय सेवा, सुविधाहरु भरतपुर क्यान्सर अस्पताल भन्दा स्तरीय दिनेगरी भौतिक पूर्वाधारहरु तयार गरिएका छन् ।’
दुई जना अंको सर्जन, दुई मेडिकल अफिसर, नर्सिङ इन्चार्ज, आठ जना स्टाफ नर्स सहित २७ जनाको दरबन्दी लोकसेवा आयोग मार्फत पूर्ति गरेको क्यान्सर अस्पतालले ११ जना थप कर्मचारी ‘आउट सोर्सिङ’बाट भर्ना प्रक्रिया अगाडि बढाएको छ । ‘सुरक्षादेखि सरसफाईसम्मका कर्मचारीहरु कन्ट्रयाक बेशमा लिंदैछौं’, अध्यक्ष कक्षपतिले भने ।
२०६५ सालमा कक्षपतिको अगुवाईमा संगठित स्थानीयबासीले महायज्ञ लगायर प्रखर परोपकार मिशन सुरु गरेका थिए । ‘महायज्ञबाट पाँच करोड बोलकबोल भएपनि तीन करोड रुपैयाँ संकलन गर्न सफल भइयो’, संस्थापक अध्यक्ष कक्षपतिले अस्पतालको सपना विजारोपण हुँदाको स्मरण गर्दै भने, ‘त्यो जनसहभागिता नै यो अस्पतालको जग हो ।’ हुनपनि त्यसको केही बर्षपछि माधव कुमार नेपाल प्रधानमन्त्री भएपछि अस्पताललाई सरकारी बजेट दिन थालिएको थियो ।
हालसम्म ३५ करोड बढी लगानी भैसकेको अस्पतालका भौतिक संरचना निर्माणमा थप २५ करोड रुपैयाँ यस बर्षका लागि माग गरिएको छ । ‘उपकरण र प्रशासनिक खर्चका लागि ४५ करोड ५० लाख र भवन निर्माणका लागि २५ करोड थप बजेट माग गरिएको छ’, निर्मार्णाधिन रेडियोलोजी ब्लक देखाउँदै अध्यक्ष कक्षपतिले भने, ‘शुभारम्भ अघि यो काम सकिसक्नेछौं ।’
अध्यक्ष कक्षपति, कार्यकारी निर्देशक डा. पौडेल लगायतको टोली अबेर साँझसम्म अस्पताल परिसरमै व्यस्त देखिन्थ्यो । ‘अहोरात्र खटिएर बैशाखको अन्तिम सातासम्म अस्पताल सञ्चालन गरेरै छाड्ने गरी काम भैरहेको छ’, उनले त्यसो भनिरहँदा ओपिडि ब्लकमा दर्जनौं मजदुर काममा खटिएका थिए ।
देशकै सुविधा सम्पन्न क्याबिन सहितका ५९ शैय्या जडान भैरहेको क्यान्सर अस्पतालमा ल्याब, एक्सरे मेसिन, अत्याधिक सुविधा सम्पन्न अपरेश थियटर तयार भैसकेको छ । ‘एम्बुलेन्स पनि आइसक्यो’, अध्यक्ष कक्षपतिले उत्साहित हुँदै भने, ‘पश्चिम नेपालकै लागि गौरवपूर्ण अस्पताल निर्माण कार्यले छिट्टै सार्थकता पाउँदैछ ।’ ओपिडि ब्लक निर्माण सकिएको, रेडियोलोजी ब्लक अन्तिममा पुगेको जानकारी दिंदै अध्यक्ष कक्षपतिले भने, ‘प्रशासनिक ब्लक, चिकित्सक क्वाटर र फार्मेसी ब्लक निर्माणका लागि बजेट माग गरिएको हो ।’ अस्पतालले आफ्नै फार्मेसी व्यवस्थापन गरी सहुलियत दरमा औषधी बिक्री वितरणको व्यवस्था मिलाउने योजना बनाएको अध्यक्ष कक्षपतिले जानकारी दिए ।
