मुख्यमन्त्री देखि प्रधानमन्त्री सम्मलाई दबाब दिने योजना सहित
नेपालगन्ज उपमहानगरपालिकाले नेपालगन्ज विमानस्थललाई अन्तर्राष्ट्रिय
स्तरको बनाउन औपचारिक पहल लिएको हो ।
हिमाल गैरे/दैनिक नेपालगन्ज
पश्चिम नेपालकै सबैभन्दा चाप व्यहोरिरहेको नेपालगन्ज विमानस्थललाई अन्तर्राष्ट्रिय स्तरको बनाउन औपचारिक पहल थालिएको छ । नेपालगन्ज उपमहानगरपालिकाले प्रदेश ५ का मुख्यमन्त्री शंकर पोखरेल देखि प्रधानमन्त्री केपी शर्मा ओली सम्मलाई दबाब दिने योजना सहित नेपालगन्ज विमानस्थललाई अन्तर्राष्ट्रिय स्तरको बनाउन औपचारिक पहल लिएको हो । त्यसका लागि बुधवार नगरप्रमुख डा. धवल समशेर राणाले सर्वपक्षिय/सर्वदलीय बैठक डाकेका हुन् ।
‘सर्वदलीय बैठकले राझास्थित नेपालगन्ज विमानस्थललाई अन्तर्राष्ट्रिय विमान स्थलका रुपमा विकास र विस्तार गर्न आवश्यक प्रक्रिया अगाडी बढाउन नेपाल सरकारसँग अनुरोध गरेको छ,’ नगर प्रमुख राणाले दैनिक नेपालगन्ज सँग भने ।
नगर प्रमुख डा. राणाको अध्यक्षतामा भएको बैठकमा प्रदेश सभा सदस्य, वडाध्यक्ष, सम्वद्ध निकायका अधिकारी, नागरिक समाजका अगुवाहरु, राजनीतिक दलका प्रतिनिधि, नेपालगन्ज उद्योग वाणिज्य संघ, नेपाल पत्रकार महासंघका अध्यक्ष तथा प्रतिनिधिहरु सहभागी रहेको उपमहानगरपालिकाका सूचना अधिकारी शरद पौडेलले जानकारी दिए । उनका अनुसार, बैठकले नेपालगन्ज विमानस्थललाई अन्तर्राष्ट्रिय विमान स्थलको रुपमा विस्तार गर्न आवश्यक प्रक्रिया अगाडि बढाउन ५ नं. प्रदेश सरकार र संघीय सरकार आवश्यक दबाब दिन पनि पहलको जिम्मेवारी नगरप्रमुख डा. राणालाई दिएको छ ।
‘यो निर्णय लिएर छिट्टै मुख्यमन्त्री र प्रधानमन्त्री सँग भेटघाट गर्दैछु,’ नगरप्रमुख राणाले भने, ‘हामीले खोजे र सोंचे अनुसारका भौतिक पूर्वाधार र विकासका संरचना नेपालगन्जमा बन्यो भने राजधानी हुनु र नहुनुसँग हाम्रो ठुलो गुनासो रहनेछैन ।’ डा. राणाले पश्चिम नेपालको प्रवेश विन्दु र व्यापारिक नाका भएको नेपालगन्जमा सुख्खाबन्दरगाह निर्माण प्रक्रिया अघि बढिरहेको र मानसरोवरलगायत अन्य धार्मिक स्थलहरु सम्मको पर्यटकीय रुट विस्तार हँुदै गरेको सन्दर्भमा अन्तर्राष्ट्रिय विमानस्थल बनाउनुपर्ने आवश्यकता बढ्दै गएको बताए ।
‘सरकारले छिट्टै नेपालगन्ज विमानस्थलको विकास र विस्तारका लागि पूर्वाधार निर्माण सम्बन्धी एक अध्ययन टोली गठन गरी प्रक्रिया बढाउने काम सुरु गरोस् भन्नेमा तत्काल पहल लिइएको छ,’ नेपालगन्ज उपमहानगरपालिकाका प्रमुख प्रशासकीय अधिकृत हरि प्याकुरेलले भने । ‘चाप बढ्दै गएकाले पनि विमानस्थल विस्तार आवश्यक हुँदै गएको छ,’ बैठकमा नागरिक उड्डयन प्राधिकरण नेपालगन्जका प्रमुख प्रताप बाबु तिवारीले भने । तिवारीले विभिन्न संरचनाहरु सुधारका काम भइरहेको जानकारी पनि दिए ।
बैठकमा भारतीय शहरहरुमा उडानको व्यवस्था गरिदिन पनि माग आइरहेकाले पनि मानसरोवर लगायत अन्य धार्मिक पर्यटकीय स्थलमा आउने भारतीय तिर्थयात्रुहरु, व्यापारिक तथा अन्य यात्रुहरुलाई मध्यनजर विमानस्थलको विकास आवश्यक देखिएको बताइएको थियो । ‘हवाई यातायात उपलब्ध गराउन तत्काल भारतका शहरहरुमा हवाई उडान गर्न आवश्यक व्यवस्थापनका लागि अनुरोध गर्ने निर्णय गरिएको छ,’ उपमहानगरपालिकाका सूचना अधिकारी पौडेलले भने ।
प्रदेश सभासदस्य सुरेन्द्र हमाल, आइपी खरेल, पार्वती (उषा) पुन, मो. याकुब अन्सारी, जिल्ला समन्वय समितिका प्रमुख अजय श्रीवास्तव, नेकपा एमालेका अध्यक्ष अशोक कोइराला, राजपा नेता केशवराम बर्मा, जिल्ला प्रहरी प्रमुख टेक बहादुर तामाङ, पत्रकार महासंघ बाँके अध्यक्ष ठाकुर सिंह थारु, निवर्तमान केन्द्रीय सदस्य झलक गैेरे, नेपालगन्ज उद्योग वाणिज्य संघका अध्यक्ष नन्दलाल वैश्य लगायतले बैठकमा नेपालगन्जको विकासका विमानस्थलको बृहत विस्तारमा सबैतिरबाट पहलको धारणा औल्याइएको थियो ।
‘नेपालगन्जबाट कहाँ कहाँ नयाँ उडानको आवश्यकता छ भन्नेबारे विमान कम्पनीहरुसँग पनि छुट्टै छलफल गरिंदैछ,’ भारतका विभिन्न सहरमा उडानका इच्छा व्यक्त भइरहेको जानकारी दिंदै नगरप्रमुख डा. राणाले भने । विमानस्थल विस्तार, उडानका अवस्था सुधारका लागि एअरलाइन्स र आम उपभोक्ताको सामुहिक माग आइरहेकाले पनि उपमहानगरपालिकाले पहल लिएको नगर प्रमुख डा. राणाको भनाइ छ ।
नेपालगन्ज विमानस्थल क्षेत्रमा रहेका जग्गा मुआब्जा सम्बन्धी सवाल सम्बोधन बाँकी नै रहेको विषयमा पनि छलफल गरिएको छ । ‘केही व्यक्तिले मुआब्जा प्राप्त गरेको तर कतिपयले हाल सम्म मुआब्जा नपाएको विषयमा टुङ्गो लगाउन यथाशिघ्र प्रारम्भिक अधिकारी तोकी प्रक्रिया अगाडि बढाउन पनि नेपाल सरकार समक्ष अनुरोधसहितको माग गरिएको’ नेपालगन्ज २० का वडाध्यक्ष कृष्ण कार्कीले जानकारी दिए । वडाध्यक्ष कार्कीले अन्तर्राष्ट्रिय स्तरको उडान भर्न विमानस्थलको विस्तारका लागि जग्गा अधिग्रहण आवश्यक रहेकाले त्यसअघिनै पुराना मुआब्जाका सवाल सम्बोधन आवश्यक भएको बताए ।
यात्रुलाई सुविधा कक्ष
दैनिक नेपालगन्ज
नेपालगन्ज विमानस्थलमा यात्रुहरुका लागि सुविधा कक्ष थप गर्न माग गरिएको छ । नेपालगन्ज उपमहानगरपालिकाका प्रमुख डा. धवल समशेर राणाले नागरिक उडड्यन प्राधिकरण नेपालगन्जलाई विमानस्थलमा यात्रु सुविधा कक्ष व्यवस्था गर्न माग गरेका हुन् ।
खासगरी मानसरोवरका लागि आउने भारतीय श्रद्धालु भक्तजन यात्रुहरुको व्यवस्थापनमा निकै असुविधा परेको गुनासो आएकाले सुविधा कक्ष व्यवस्थाका लागि माग गरिएको डा. राणाले जानकारी दिए । ‘भारतीय राजदुतावास बाट समेत गुनासो आइसकेको छ’, डा. राणाले दैनिक नेपालगन्जसँग भने, ‘त्यसका लागि नेपालगन्ज उपमहानगरपालिका आवश्यक पहल लिन तयार छ ।’
प्राधिकरण प्रमुख प्रतापबाबु तिवारीले सुविधा कक्ष निर्माणका लागि आवश्यक प्रक्रिया सुरु गरिएको जानकारी दिए । नगर प्रमुख राणाले भने स्थायी निर्माण अघि तत्कालै देखि अस्थायी रुपमै भएपछि वातानुकुलित यात्रु सुविधा कक्ष व्यवस्था गर्न दबाब दिएका छन् ।
‘स्थलगत अवस्थाको अवलोकन गर्न बिहिबार (आज) विमानस्थल पुग्दैछौं’, डा. राणाले भने, ‘जसरी हुन्छ यात्रुहरुलाई लामो समयसम्म उडान प्रतिक्षा गर्दा बाधा महसुस नहुने गरी विश्रामको व्यवस्था गर्नुपर्छ भन्नेमा हाम्रो जोड छ ।’
