दैनिक नेपालगन्ज
प्रदेश ५ का मुख्यमन्त्री शंकर पोखरेलले प्रदेशको वस्तुस्थिति अध्ययन भैरहेको बताएका छन् । त्यसका आधारमा स्वेतपत्र जारी गर्ने तयारी खुलासा गर्दै मुख्यमन्त्री पोखरेलले आइतबार नेपालगन्जमा आयोजित प्रादेशिक, आर्थिक बहसमा भने, ‘त्यही स्वेतपत्रका जगमा अल्पकालीन, मध्यकालीन र दीर्घकालीन योजनाहरु निर्माण गरिनेछन् ।’
प्रादेशिक आर्थिक बहसमा प्रदेश ५ का मुख्यमन्त्री शंकर पोखरेलले भने, ‘स्वेतपत्रको जगमा आर्थिक समृद्धिको रणनीति’
प्रदेश ५ का सांसदहरु, नेपाल उद्योग वाणिज्य महासंघका वरिष्ठ पदाधिकारी, विभिन्न जिल्ला तथा नगर उद्योग वाणिज्य संघका पदाधिकारी, विकासविद्, अर्थविद्हरु, प्रतिनिधिमूलक उद्योगी व्यवसायी सम्मिलित कार्यक्रममा मुख्यमन्त्री पोखरेलले दोहोरो करको शंका नगर्न आश्वस्त पारेका छन् । ‘स्थानीय तहको कर केन्द्रसम्म, प्रदेश र केन्द्रको कर स्थानीय तहसम्म बाँडफाँडको व्यवस्था मिलाइनेछ’, मुख्यमन्त्री पोखरेलले भने, ‘दोहोरो करको भार पारिनेछैन ।’
मुख्यमन्त्री पोखरेलले आर्थिक समृद्धिका लागि प्रदेश ५ मुलुककै उत्कृष्ट साबित हुनसक्ने विभिन्न सम्भावनाहरु औंल्याउँदै भने, ‘हाम्रो प्रदेश समृद्ध बन्यो भने नेपाल नै समृद्ध बन्न सक्छ ।’ त्यसका लागि पर्याप्त स्रोत र सम्भावनाका आधारहरु प्रस्तुत गर्दै मुख्यमन्त्री पोखरेलले प्रदेश ५ का आर्थिक तथा व्यवसायिक सम्भाव्यता र विकासका प्राथमिकतामा सरोकारवालाहरुसँग बहसमा सहभागी भए । 
‘अनौपचारिक अर्थतन्त्र फष्टाइरहेको मुलुकमा त्यसलाई औपचारिक बनाउन’ उद्योग, वाणिज्य क्षेत्रको सहयोग अपिल गर्दै मुख्यमन्त्री पोखरेलले जनतालाई राज्यसँग जोड्ने संविधान बनिसकेकाले मुलुक समृद्ध बन्न धेरै बेर नलाग्ने आश्वासन दिए ।
नेपाल उद्योग वाणिज्य महासंघले नयाँ पत्रिका, नेपाल आर्थिक पत्रकार समाज, नेपाल उद्योग वाणिज्य महासंघ प्रदेश ५ र नेपालगन्ज उद्योग वाणिज्य संघसँगको सहकार्यमा प्रादेशिक आर्थिक बहस आयोजना गरेको हो । ‘प्रत्येक प्रदेशमा यसखालको बहस आयोजना गरी अन्तिममा प्रधानमन्त्रीको उपस्थितिमा राष्ट्रिय बहस गरिनेछ’, महासंघका अध्यक्ष भवानी राणाले प्रदेश ५ का आर्थिक तथा व्यवसायिक सम्भाव्यता र विकासका प्राथमिकता विषयक बहसमा भनिन्, ‘समृद्ध मुलुक बनाउने राष्ट्रिय सरोकारमा निजी क्षेत्र सहकार्य गर्न तयार छ ।’
अध्यक्ष राणाले सरकारले समृद्ध राष्ट्रको अभियान अघि सारेकाले प्रदेश स्तरमा आर्थिक नीति बनाउँदा प्रादेशिक र जिल्ला स्थित उद्योग, वाणिज्य संघहरुसँग सहकार्य गर्न मुख्यमन्त्रीसँग आग्रह गरिन् । प्रदेश ५ धार्मिक पर्यटन र औद्योगिक करिडोरको सम्भावनाको केन्द्र रहेको औंल्याउँदै महासंघका अध्यक्ष राणाले आफ्नो तर्फबाट सरकारलाई संस्थागत रुपमै सहयोगको प्रतिबद्धता जनाइन् ।
बहसमा अवधारणा प्रस्तुत गर्दै विकासविद् कृष्ण बहादुर कुँवरले प्रदेश ५ को नयाँ संरचनामा भावनात्मक सम्बन्धको विकासमा काम गर्न मुख्यमन्त्री पोखरेलको ध्यानाकर्षण गराए । ‘त्यसका लागि प्रादेशिक रिङ्गरोड निर्माण गरिनुपर्छ’, कुँवरले प्रत्यक्ष सडकको विकासले भावनात्मक सम्बन्धको बिस्तार हुने बताए ।
प्रदेश ५ का २५ बढी जिल्ला नगर उद्योग, वाणिज्य संघका पदाधिकारीहरु प्रत्यक्ष सहभागी भएको बहसमा नयाँ पत्रिकाका प्रधानसम्पादक कृष्ण ज्वाला देवकोटाले आर्थिक समृद्धिका विषयलाई महत्वका साथ अगाडि बढाइनु पर्ने बताए । उद्योग, वाणिज्य महासंघका वरिष्ठ उपाध्यक्ष शेखर गोल्छा, किशोर प्रधान, चन्द्र ढकाल, निवर्तमान अध्यक्ष पशुपति मुरारका, विकासविद् रमेश अधिकारी लगायतले धारणा प्रस्तुत गरेको बहसमा नेपालगन्ज उद्योग वाणिज्य संघका अध्यक्ष नन्दलाल वैश्य, कोहलपुर उद्योग वाणिज्य संघका अध्यक्ष चक्र बहादुर अधिकारी लगायत विभिन्न उद्योग, वाणिज्य संघका पदाधिकारीहरुले सुझाव दिएका थिए ।
