बैशाख पहिलो साताबाट हुने प्रतियोगिताका लागि पहिलो पटक टिम अक्सनबाट तयार गरिदैं
‘स्वास्थ्य युवाका लागि, युवा राष्ट्रका लागि’ मुल नाराका साथ बाँकेको कोहलपुरस्थित प्रस्तावित अन्तर्राष्ट्रिय क्रिकेट मैदानमा ‘नेपालगन्ज कप क्रिकेट’ को आयोजना हुने भएको छ । पहिलोपटक फरक किसिमले क्रिकेट प्रतियोगिता आयोजना गरेको ग्रीन इभेन्टो प्रालिले अक्सनमार्फत नौलोपन दिन लागेको हो । ‘बढाबढ मुल्यका आधारमा टिम खरिद गर्न सकिनेछ,’ आयोजक ग्रीन इभेन्टोका प्रबन्ध निर्देशक मोहम्मद रफिले बुधवार पत्रकार सम्मेलनमा भने, ‘हरेक टिमको सुरुवाती मुल्य ५० हजार तोकिएको छ ।’
आगामी बैशाख ३ देखि १२ गतेसम्म सञ्चालन हुने प्रतियोगितामा ६ टिमलाई सहभागी गराइने निश्चित भएको जानकारी दिंदै आयोजकले ‘नेपालगन्ज कप’ क्रिकेट प्रतियोगिता टी–२० फम्र्याटमा जनाएको छ । पाँच नम्बर प्रदेश तथा अन्य ठाउँमा रहेका खेलाडीमध्येबाट छनोट समितिले प्रारम्भमा ९० खेलाडी छनोट गरेर उनीहरुबाट ६ टिम तयार गरिने मो. रफिले जानकारी दिए । ‘हरेक टिमको सुरुवाती मुल्य ५० हजार तोकेर खरिदका लागि व्यवस्था मिलाइनेछ ।’
हरेक टिममा अनुभवी खेलाडीलाई मेन्टरको रुपमा उपलब्ध गराउने योजना सुनाउँदै प्रबन्ध निर्देशक रफिले भने –‘टिम मालिकलाई आर्थिक लगानी बाहेक थप झन्झट हुनेछैन, खेलाडीलाई आवास, भोजन, जर्सी लगायत सम्पुर्ण व्यवस्थापन आयोजकले नै गर्नेछ ।’ नेपालगन्जमा यसरी पहिलो पटक अक्सन विधिमा प्रतियोगिता गर्न लागेको हो ।
आयोजकका अनुसार, प्रतियोगिताको कुल लागत २८ लाख ८५ हजार ७ सय ५० रुपैयाँ रहेको छ । विजेता टिमलाई एक लाख १० हजार, उपविजेतालाई ६० हजार नगद पुरस्कारले पुरस्कृत गरिनेछ । अन्य विधागत पुरस्कार समेत नगद व्यवस्था गरिएको जनाउँदै कुल नगद पुरस्कार दुई लाख विनियोजन गरिएको प्रवन्ध निर्देशक मो. रफिले बताए ।
नेपालगन्ज क्रिकेट कपका इभेन्ट डाइरेक्टर सौगातविक्रम शाहले प्रतिभावान क्रिकेटर उत्पादनको उद्देश्यले प्रतियोगिता आयोजना गर्न लागिएको बताए । ‘त्यसका लागि प्रदेश नं. ५ बाट ६० प्रतिशत र अन्य ठाउँबाट ४० प्रतिशत अनुपातमा खेलाडी सहभागि गराउन जोड दिइरहेका छौं ।’ इभेन्ट डाइरेक्टर शाहले भने –‘नेपालगन्जका लागि यो नयाँ अभ्यास हो, हाम्रो प्रमुख उद्देश्य यहाँको क्रिकेट माथि उकास्नु नै हो।’ अक्सनमा टिम खरिद गर्न झण्डै डेढ दर्जन उद्योगी व्यवसायी इच्छुक रहेको शाहले जानकारी दिए । प्रतियोगितामा जिल्ला, क्षेत्र र राष्ट्रिय तथा अन्तर्राष्ट्रिय प्रतियोगितामा अनुभव बटुलिसकेका खेलाडीहरुलाई बढीभन्दा बढी सहभागी गराउन जोड गरिएको छ ।
पत्रकार भेटमा राष्ट्रिय खेलकुद परिषदका सदस्य विनोद मैनालीले हरेक प्रतियोगिताका लागि राखेप सहयोग गर्न तयार रहेको बताए । आयोजकले प्रतियोगिता निरन्तरताको आधार तयार गर्न सके आगामी बर्षदेखि यस प्रतियोगितालाई राखेपको क्यालेन्डरमा समावेश गराउन आफुले कुनै कसर बाँकी नराख्ने उनको भनाइ छ । मध्यपश्चिम क्षेत्रीय खेलकुद विकास समितिका अध्यक्ष भिम ओलीले मिसन आठौं राष्ट्रिय खेलकुदलाई टेवा पुग्ने गरी आयोजना गरिने हरेक प्रतियोगितालाई सघाउन आफुहरु तयार रहेको बताए । ‘प्रतियोगिता तिथि सार्वजनिक गर्नु आफैंमा खुशीको कुरा हो, यसले हाम्रो अभियानमा पनि टेवा पुग्दछ ।’
नेपाली राष्ट्रिय क्रिकेट टिमका पुर्व कप्तान एलबी क्षेत्रीले परिकल्पना र अवधारणा यस ठाउँका लागि नौलो भएकाले खेलाडीलाई उत्साह जगाउने धारणा व्यक्त गरे । नेपालगन्ज कपका नाममा कोहलपुरमा प्रतियोगिता गरिंदा दुई सहरको भावनात्मक सम्बन्ध प्रगाढ हुने विश्वास पनि व्यक्त गरिएको छ । पत्रकार सम्मेलनमा प्रतियोगिताका लागि बाँके जिल्ला क्रिकेट संघको प्राविधिक सहयोग, मध्यपश्चिम क्षेत्रीय खेलकुद विकास समितिले समन्वय र क्रियटिभ ह्याण्ड्स रणनीतिक पार्टनरका रुपमा रहेको बताइएको थियो ।
