देबेन्द्र राज पौडेल/दैनिक नेपालगन्ज
बागेश्वरी मन्दिरको जिन्सी राखिएको भनिएको बाकसको रहस्य बुधवार बाहिर आउने भएको छ ।
बागेश्वरी मन्दिरमा स्थापित रहेको मूर्तिको सुनचाँदीका गहना एकत्र गरी राखिएको भनिएको बाकस भित्र के छ, यो निकै रहस्यको विषय बन्दै गएको थियो । बाँकेको मालपोत कार्यालय राखिएको बाकसमा भएको सम्पत्ती सार्वजनिक गर्न विभिन्न पक्षबाट पहल थालिएपछि पर्सि बुधवार उक्त बाकस खुल्ने तय भएको हो ।
बागेश्वरी मन्दिरको सम्पत्ति रहेको दावी गरिएको उक्त बाकसमा केहि छ वा छैन भन्ने विषयमा सरकारी अधिकारीहरु प्रष्ट छैनन् । ३० बर्ष अघि मन्दिरको सुनचाँदी र नगद लगायतका सम्पत्ति राखिएको फलामका २ वटा बाकसहरु मापपोत कार्यालयमा अलपत्र अवस्थामा रहेको छ ।
अधिवक्ताहरु सुनिल कुमार श्रेष्ठ, लोक बहादुर शाह, बल बहादुर चन्द, बसन्त गौतम र कौशल कुमार बर्माले संयुक्त रुपमा प्रमुख जिल्ला अधिकारी रमेश कुमार केसीलाई भेटेर वागेश्वरी मन्दिरको दुई वटा सन्दुक (तिजोरी) को संरक्षण गर्न माग गरेका थिए ।
पञ्चायत कालमा अञ्चलाधीशको कार्यालय हुन्थ्यो । त्यस बेला सबै सरकारी कार्यालयहरुको आर्थिक र जिन्सी क्रियाकलाप हेर्नका लागि माल अड्डा (अहिलेको मालपोत कार्यालय) थियो । त्यस बेला उच्च सुरक्षाको बीच संचालन हुने कार्यालय २०४८ पछि विस्तारै सेवाप्रदायक कार्यालयको रुपमा परिचित र विस्तारित हुँदै गयो । त्यसपछि पनि बाकस उक्त कार्यालय भित्रै असुरक्षित अवस्थामा रहेको छ ।
तीन वटा ताला रहेको ठूलो बाकस आशंका कै घेरामा छ, त्यसमा भएको सम्पत्ति नगदी जिन्सी छ वा गायब छ भन्ने विषयमा बाकस नखुल्दा सम्म भन्न सक्ने अवस्था छैन । प्रमुख जिल्ला अधिकारी रमेश कुमार केसी, मन्दिर ब्यवस्थापन समिति, गुठि संस्थान र पुरातत्व विभागका प्रतिनिधिको रोहबरमा बाकस खोलिने तय भएको छ ।
‘बुधवार विहान ९ बजे बाकस खोल्ने तय भएको छ’, आइतवार बसेको बैठकमा सहभागी अधिवक्ता बल बहादुर चन्दले भने, ‘बाकसबाट प्राप्त हुने सम्पत्तीलाई सरकारी स्वामित्व रहेको बैंकमा दाखिला गर्ने निर्णय समेत भएको छ ।’ नेपालगन्ज उपमहानगरपालिकाका मेयर डा.धवल समशेर राणाको अध्यक्षतामा भएको बैठकले बाकस खोल्ने निर्णय गरेको अधिवक्ता चन्दले बताए ।
