नेकपा (एमाले) सम्बद्ध युवाहरुको संगठन, राष्ट्रिय युवा संघ नेपालको नवौं राष्ट्रिय महाधिवेशनको तयारीमा तिब्रता दिइएको छ । नेपालगन्जमा यहि चैत २७ देखि २९ गतेसम्म हुने महाधिवेशनको तयारीमा तिब्रता दिइएको हो ।
त्यसका लागि राष्ट्रिय युवा संघका अध्यक्ष किरण पौडेल, उपाध्यक्ष सुमन पुरीसहितका पदाधिकारीहरु नेपालगन्जमा आइपुगेका छन् । आयोजक मूल समितिका नेताहरुले महाधिवेशन तयारीका ८० प्रतिशत काम पूरा भएको जनाएका छन् ।
राष्ट्रिय युवा संघका अध्यक्ष पौडेलका अनुसार, पूर्व प्रधानमन्त्री एवं नेकपा एमाले अध्यक्ष केपी शर्मा ओलीले उद्घाटन गर्ने महाधिवेशनको तयारीमा जिल्ला पार्टी नेतृत्वसमेत सक्रिय छ ।
उद्घाटन समारोहलाई भव्य बनाउन मञ्च व्यवस्थापन, आवास तथा खाद्य व्यवस्थापन, प्रतिनिधि व्यवस्थापन लगायतका कामहरु धमाधम भइरहेको अध्यक्ष पौडेलले बताए ।
‘दुई हजार भन्दा बढि प्रतिनिधि सहभागि हुने महाधिवेशनलाई भव्यतापूर्वक सफल पार्नेगरी तयारी भईरहेको छ’, अध्यक्ष पौडेलले सञ्चारकर्मीहरुसँग भने,‘अहिलेसम्म ८० प्रतिशत तयारी भइसकेको छ, दुईदिनमा बाँकी काम पनि पूरा हुनेछ ।’
महाधिवेशन उद्घाटन समारोहमा नेकपा (एमाले) बाँकेसँगको समन्वयमा दश हजारबढी जनपरिचालन गरिने तयारी भइरहेको अध्यक्ष पौडेलले बताए । उनका अनुसार, त्यसका लागि केन्द्रिय सदस्य एवम् बाँके इन्चार्ज सूर्य ढकाल, जिल्ला अध्यक्ष किस्मतकुमार कक्षपति लगायत पार्टी कमिटी समेत खटिएको छ ।
महाधिवेशन उद्घाटन समारोहमा पार्टी अध्यक्ष ओलीसँगै, उपाध्यक्ष रामबहादुर थापा (बादल), महासचिव शंकर पोखरेल, स्थायी कमिटी सदस्य एवम् मोर्चा संगठन इन्चार्ज भानुभक्त ढकाल, पोलिटव्यूरो सदस्य महेश बस्नेत लगायतका नेताहरु सहभागी हुने कार्यक्रम तय भएको युवा नेता रबिन्द्र लम्साल जानकारी दिए । महाधिवेशन आवास तथा खाद्यान्न समिति संयोजक एमाले बाँकेका संयोजकसमेत रहेका लम्सालले देशभरीका दुईहजार प्रतिनिधि र अतिथिहरुको नेपालगन्ज र कोहलपुरका होटलमा बासको व्यवस्था गरिएको बताए ।
आयोजकका अनुसार, उद्घाटन समारोहमा चर्चित लोककलाकार बद्रि पंगेनी, राजा राजेन्द्र, अस्मिता अधिकारी, रबि वड लगायतले सांगीतिक प्रस्तुति दिनेछन् ।
त्यसको प्रचारप्रसारका लागि प्रचारप्रसारमा युवा संघका कार्यकर्ता परिचालित छन् । नेपालगन्जका विभिन्न ठाउँमा झण्डा व्यानर, पोष्टर टाँस्ने कामलाई तिब्रता दिइएको मूल आयोजक समितिका संयोजक सुर्य ढकालले जानकारी दिए ।
प्रतिनिधिसभा सदस्य ढकालका अनुसार, त्यसक्रममा युवा संघका कार्यकर्ताहरु बाँकेका ८१ वडामा परिचालित भएका छन् ।
