नेपाली कांँग्रेस बाँकेले आज शनिवार जिल्ला सम्मेलन गर्दैछ । जिल्ला सम्मेलन उद्घाटनका लागि पार्टी महामन्त्री गगन थापा शुक्रवारनै नेपालगन्ज आइसकेका छन् ।
पार्टी जिल्ला सभापति नारायणप्रसाद गौडेलले १ हजार ६ सय प्रतिनिधि सहभागी हुने सम्मेलनले सांगठनिक, आर्थिक, वार्षिक नीति तथा कार्यक्रमको प्रस्तुतिकरण र त्यसमा छलफल बहस गर्ने जानकारी दिंदै तयारी पुरा भएको बताए ।
कार्यक्रममा प्रजातन्त्र सेनानी, पूर्व पार्टी सभापति, उत्कृष्ट वडा सभापति, महिला वडा सभापति, सहिद परिवार तथा जनआन्दोलन र द्वन्द्वका घाइतेहरुलाई सम्मान पनि गरिने भएको पार्टी सचिव सुधांशु कोइरालाले जानकारी दिए ।
जिल्ला सम्मेलनको पूर्वसन्ध्यामा नेपाली कांग्रेस बाँके क्षेत्र नम्बर २ को प्रथम क्षेत्रीय सम्मेलन शुक्रवार नेपालगन्जमा आयोजना भएको छ ।
क्षेत्रीय सभापति रमेशकुमार गुप्ताको सभापतित्वमा भएको सम्मेलन पार्टी केन्द्रिय सदस्य मैकुलाल बाल्मिकीले उद्घाटन गरेका हुन् । सम्मेलन उद्घाटन गर्दै बाल्मिकीले कांग्रेसको संगठनलाई जुझारु र सशक्त बनाउनतर्फ लाग्न नेता कार्यकर्तालाई निर्देशन दिए ।
जिल्ला पार्टी सभापति नारायणप्रसाद गौडेल, पूर्व पार्टी सभापतिहरु गजेन्द्र हमाल, किरण कोइराला, कृष्णमान श्रेष्ठ, महाधिवेशन प्रतिनिधि अजितकुमार शर्मा, कांग्रेस नेता एवम् तरुण दलका पूर्व महासचिव हुर्मत न्यौपाने लगायतले सम्मेलनमा बोलका थिए ।
सम्मेलनमा सांगठनिक र आर्थिक प्रतिवेदन प्रस्तुतिसंगै पार्टीको सांगठनिक अवस्था, भावी कार्यदिशा र योजनाबारे पनि छलफल भएको बताइएको छ ।
शुक्रवारनै, नेपाली कांग्रेस क्षेत्रीय कार्यसमिति क्षेत्र नम्बर १ बाँकेको आदिवासी जनजाती शाखालाई पूर्णता दिइएको छ । आदिवासी जनजाती शाखामा कृष्णबहादुर पुन, खडकबहादुर थापा मगर, तेजबहादुर पुन मगर, चन्द्रशेखर श्रेष्ठ, अमृता गुरुंग, हरिकला मगर, धनकुमारी पुन मगर, भगवती बुढा मगर, विरबहादुर थापा, देवबहादुर थापा, तारा राना मगर, जिम्बा राना, चेतबहादुर पुन, खगीसरा राना र नैनसिंह गाहामगरलाई मनोनयन गरिएको हो ।
त्यसक्रममा पार्टीले कोहलपुरमा आदिवासी जनजाती समुदायको हकहितका लागि नेपाली कांग्रेसको भूमिका विषयक कार्यक्रम आयोजना गरेको छ ।
आदिवासी जनजाती शाखाका कृष्णबहादुर पुनको अध्यक्षता एवम् नेपाली कांग्रेस लुम्बिनी प्रदेश कार्यसमिति सदस्य टेकनारायण भुषालको प्रमुख आतिथ्यतामा गरिएको कार्यक्रममा कांग्रेस बाँकेका उपसभापति कृष्णबहादुर कार्की, क्षेत्रीय सभापति पोषण केसी, जिल्ला सदस्य राजेन्द्र श्रेष्ठ, महाधिवेशन प्रतिनिधि नमबहादुर आले लगायतले बोलेका थिए ।
