हुम्ला पुग्यो ‘स्कुल टु ओलम्पिक’ कार्यक्रम

नेपाल ओलम्पियन एसोसियसनले कर्णालीको हुम्लामा ‘स्कुल टु ओलम्पिक’कार्यक्रम सञ्चालन गरेको छ ।


हुम्ला जिल्ला खेलकुद विकास समितिको आयोजनामा आइतवार सदरमुकाम सिमकोटमा भएको कार्यक्रममा ओलम्पियनहरुले आफ्ना संघर्ष र सफलताका कथा सुनाएका छन् ।


कार्यक्रममा नेपाल ओलम्पियन संघका महासचिव ओलम्पियन राजेन्द्र भण्डारीले दृढ इच्छा शक्तिले नै हरेक बालबालिकालाई सफलतातर्फ उन्मुख गराउने बताए ।


विश्व कीर्तिमानी धावक ओलम्पियन हरिबहादुर रोकायले दुर्गम जिल्ला जुम्लाबाट करिअर सुरु गर्दा पनि निरन्तर लगावका कारणले आफुले सफलता हासिल गरेको अनुभव सुनाए । त्यसैगरी ओलम्पियन देवु थापाले अभिभावकलाई विश्वास दिलाउन सके हरेक किशोर किशोरीलाई खेलतर्फ लाग्न कठिन नभएको बताइन् ।


नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले हरेक बालबालिका शारीरिक र मानसिक रुपमा स्वस्थ राख्न सानैदेखि खेलकुदमा अभिरुची दिलाउन शिक्षक तथा अभिभावकलाई आग्रह गरे ।


तेक्वान्दोकी राष्ट्रिय खेलाडी सीता तामाङले जुम्बा प्रदर्शन गर्नुका साथै ओलम्पियन देबुसँगै आत्मरक्षा सम्बन्धि प्रशिक्षण गराएका थिए ।
नेपालकै अति दुर्गम मानिएको कर्णाली प्रदेशको हुम्लामा महत्वपुर्ण कार्यक्रम गरेकोमा कर्णाली खेलकुद परिषदका उपाध्यक्ष प्रमोद हमालले नेपाल ओलम्पियन एसोसियसनलाई निरन्तर सघाउने प्रतिवद्धता जनाए ।


स्कुले किशोर किशोरीलाई सानै उमेरदेखि खेलकुदमा अभिरुची जगाउन नेपाल ओलम्पियन एसोसियसनले स्कुल टु ओलम्पिक कार्यक्रम सञ्चालन गरेको हो ।
यसैक्रमा एसोसियसनले कार्यक्रममा भाग लिएका विद्यालयलाई झण्डै एक लाख बराबरको खेल सामग्री हस्तान्तरण गरेको जनाएको छ ।
एसोसियसनका महासचिव ओलम्पियन राजेन्द्र भण्डारीले विद्यालय प्रतिनिधिलाई खेल सामग्री हस्तान्तरण गरेकाथिए ।


हुम्ला जिल्ला खेलकुद विकास समितिका अध्यक्ष विनोद बोहराले ओलम्पियन खेलाडीहरुको अनुभव सुन्न र सुनाउनपाउनु हुम्लावासीको सौभाग्य भएको चर्चा गरे ।

प्रतिक्रिया

प्रतिक्रिया