आर्थिक मन्दीले व्यवसायी पलायनको अवस्थामा पुगेको भन्दै नेपाल उद्योग तथा व्यवसायी महासंघ, बाँकेले त्यसविरुद्ध राहतको आव्हान गरेको छ ।
बुधवार नेपालगन्जमा पत्रकार सम्मलेनको आयोजना गरि महासंघले व्यापारीको पलायन रोक्न र व्यापारीलाई टिकाइ राख्नका लागि घर भाडामा छुट दिन आव्हान गरेको हो । महासंघले त्यससँगै सरकारले लिने गरेको आयकर, व्यवसाय कर छुटका लागि माग गर्दै नेपाल उद्योग वाणिज्य महासंघलाई त्यसको पहल लिन आग्रह गरेको छ ।
महासंघले नेपालगञ्जको व्यवसायलाई टिकाइ राख्न स्थानीय सरकारले लिने गरेको व्यवसायिक कर र भाडामा छुट दिने घरधनीको घरबहाल कर मिनाहा गरिदिन अनुरोध गरेको छ । ‘यसका लागि दबाब बढाउने’ महासंघको कार्यक्रम छ ।
‘कम्तिमा व्यवसायीका पक्षमा घरधनीले सकारात्मक भइदिन अनुरोध हो,’ महासंघका बाँके अध्यक्ष कृष्णप्रसाद श्रेष्ठले नियमित बढाउँदै आएको घरभाडा सहज अवस्था नहुने बेलासम्म नबढाउन आग्रह गर्दै भने, ‘नेपालगन्जमा झण्डै २ सय सटर खाली भइसकेका छन्, यो क्रम रोकिएन भने के होला ?’ अध्यक्ष श्रेष्ठले खाली भएका सटर वा गोदामलाई सहुलियत दरमा उपलब्ध गराई बजार पलायन हुनबाट रोक्न र हाल लिइरहेको भाडालाई अहिलेको आर्थिक मन्दी र घट्दो व्यापार सही स्थानमा नआउँदासम्म जति सकिन्छ, भाडादरमा छुट उपलब्ध गराउन माग पनि गरे ।
अध्यक्ष श्रेष्ठले न्यूरोडस्थित आफ्ना घरमा बसेका पाँच व्यवसायीको एक वर्षसम्म भाडादर वृद्धि नगर्ने घोषणा गर्दै दश प्रतिशत भाडा छुट दिने निर्णय सुनाए । ‘मैले आफैबाट सुरुवात गरें,’ नेपालगन्ज उद्योग वाणिज्य संघका पूर्व अध्यक्ष समेत रहेका श्रेष्ठले संघबाट यसखालको पहलको अपेक्षा गरिएपनि हुन नसकेकोमा चिन्ता गर्दै भने, ‘कोभिडका बेला पनि होटल व्यवसायी संघ नेपालगन्जको पहलमा घरधनीहरुले निकै राहत दिनुभएको थियो, अहिले अवस्था झनै खराब हुँदै गएपछि हामी यो अभियानमा निक्लिएका हौं ।’
नेपालगन्जबाट दुई सय व्यापारी पलायन भइसकेको बताइएको छ । यद्धपी यसको आधिकारिक अध्ययन भएको छैन । नेपालगन्जका मुख्य बजार क्षेत्रमै सटर खाली रहेका देखिन्छन् भने व्यवसाय हुन नसकेर बजारमा सन्नाटा बढेको छ ।
‘यो बेला हामी सबै एकजुट हुनुपर्छ, समस्याको मिलेर सामना गर्नुपर्छ,’ महासंघका सचिव भीम रानाभाटले भने, ‘यो बेला पलायन भएका व्यापारी फर्केर आउने सम्भावना रहन्न, त्यसैले पनि यो नेपालगन्जको साझा सवाल हो ।’ नगरपालिका, बाणिज्य कार्यालय, घरेलु, औषधी व्यवस्था कार्यालय, अन्तशुल्क कार्यालय, उद्योग वाणिज्य संघलगायत मातहतका कार्यालयले नविकरण तथा जरिवाना मिनाहा गरिदिनु पर्ने माग सचिव रानाभाटको छ ।
‘बैंक तथा वित्तीय संस्थाहरुले गरिरहेको ज्यादतीलाई सरकारले नियन्त्रण गर्दै अर्थतन्त्रलाई ट्रयाकमा ल्याउनु पर्छ,’ महासंघका केन्द्रीय सदस्य सन्जय अग्रवालले भने, ‘त्यतिन्जेल व्यवसायिक मर्कालाई कम गर्दै लैजान आपसी सहयोग, सहकार्य र समन्वय आवश्यक छ ।’
व्यवसायिक अगुवाहरु ज्ञानेन्द्र श्रेष्ठ, मधुसुदन शर्मा, मिना ढकाल, सरला विष्टले व्यापारीको पलायनले नेपालगन्जको रौनक घट्दै गएकाले व्यापारीलाई बचाउन र टिकाउन सबै निकाय लाग्नु पर्ने बताए ।
होटल व्यवसायी महासंघका केन्द्रीय सदस्य भिमलाल कंडेलले कोभिडमा नेपालगन्जका व्यवसायी र घरधनीले आपसी सहकार्यमा दुखपीडा बाँडेको सम्झँदै भने, ‘होटल व्यवसायी संघ नेपालगन्जको आव्हानलाई घरधनीले सम्बोधन गरिदिनु भयो ।’ उनले होटल तथा पर्यटन क्षेत्र झनै जोखिममा रहेको औल्याए ।
महासंघका जिल्ला सचिव रानाभाटका अनुसार, घरभाडा छुटको आग्रहलाई देशभरि पुर्याइनेछ भने करछुटका लागि पहल लिन नेपाल उद्योग वाणिज्य महासंघ प्रदेश र केन्द्रलाई घच्घच्याइने छ ।
