चार सय स्थानीय तहमा बन्दै आधारभूत अस्पताल

खजुरा र कोहलपुर शिलान्यास गर्दैै

बाँकेका विभिन्न स्थानीय तहमा अस्पताल बन्ने भएका छन् । चालु् आ.व.को सरकारको नीति तथा कार्यक्रम अनुसार देशभरका विभिन्न स्थानीय तहमा अस्पताल बन्न लागेको हो । संघीय सरकारले सबै स्थानीय तहमा अस्पताल निर्माण गर्ने लक्ष्यका साथ पहिलो चरणमा कूल ३ सय ९६ अस्पतालका लागि स्रोत सुनिश्चित गरेको छ । उक्त स्रोतबाट स्थानीय तहमा आधारभूत अस्पताल निर्माण हुनेछन् ।


अर्थमन्त्री विष्णुप्रसाद पौडेलले सो कार्यका लागि रु ५७ अर्ब ९७ करोड ११ लाख ९० हजार बराबरको निर्माण संरचना अगाडि बढाउने गरी स्वास्थ्य तथा जनसंख्या मन्त्रालयलाई सहमति दिएपछि स्थानीय तहहरुले अस्पताल निर्माणको प्रक्रिया अगाडि बढाएका छन् । अर्थ मन्त्रालयका प्रवक्ता रामेश्वर दङ्गालले पाँचदेखि १५ शैय्याका आधारभूत अस्पताल दुई वर्षभित्र निर्माण सम्पन्न गर्ने गरी बहुवर्षीय ठेक्का प्रक्रिया अघि बढाउन अर्थ मन्त्रालयले सहमति दिने निर्णय गरेको जानकारी दिए ।


यसरी कायम हुने रकम स्वास्थ्य मन्त्रालयको वार्षिक बजेटमा समावेश गरी स्थानीय तहमा सशर्त अनुदानका रुपमा उपलब्ध गराइनेछ । अर्थ मन्त्रालयले स्थानीय तहमा आधारभूत अस्पताल निर्माणका लागि यसअघि रु छ अर्ब १२ करोड २६ लाख स्थानीय तहमा पठाइसकेको छ ।
अर्थमन्त्री पौडेल र स्वास्थ्यमन्त्री भानुभक्त ढकालको उपस्थितिमा एक महिनाअघि भएको बैठकले गुणस्तरीय आधारभूत स्वास्थ्य सेवामा नागरिकको पहुँच सुनिश्चित गर्ने कार्यक्रमअनुसार यही मङ्सिर १५ गते भवन निर्माणको शिलान्यास गर्ने निर्णय गरेको थियो । चालू आर्थिक वर्षको नीति तथा कार्यक्रममा सबै स्थानीय तहमा पाँचदेखि १५ श्ययासम्मका आधारभूत अस्पताल स्थापना गर्ने उल्लेख गरिएको छ ।


सरकारले बजेट उपलब्ध गराएपछि खजुरा र कोहलपुरले तत्कालै अस्पताल निर्माण प्रक्रिया अगाडि बढाउने भएका छन् । ‘मंसिर १५ मा अस्पताल शिलान्यास गर्दैछौं’, बाँकेको खजुरा गाउँपालिकाका अध्यक्ष किस्मत कुमार कक्षपतिले भने । ‘अस्पताल निर्माणले खजुराको स्वास्थ्य सेवा थप प्रभावकारी हुनेछ’, अध्यक्ष कक्षपतिले भने ।

कोहलपुर नगरपालिकाका नगर प्रमुख लुट बहादुर रावतले पनि संघीय सरकारको निर्णय बमोजिम केही दिनभित्र अस्पताल निर्माणको प्रक्रिया अगाडि बढाइने जानकारी दिएका छन् । राप्तीसोनारी गाउँपालिकाकामा पनि अस्पताल निर्माणका लागि संघबाट पत्र आएको अध्यक्ष लाहुराम चौधरीले जानकारी दिएका छन् ।


नेपालगन्ज उपमहानगरपालिकालनगर प्रमुख डा. धवल समशेर राणा, नरैनापुर गाउँपालिकाका अध्यक्ष इस्तियाक अहमद शाह, राप्तीसोनोदारी गाउँपालिकाका अध्यक्ष लाहुराम चौधरी, डुडुव गाउँपालिकाका अध्यक्ष नरेन्द्र चौधरी, जानकी गाउँपालिका अध्यक्ष रामनिवास यादवले अस्पताल निर्माणका लागि संघबाट कु्नै जानकारी नआएको बताएका छन् ।

प्रतिक्रिया

प्रतिक्रिया