खजुरा- खजुरा गाउँपालिकाको पशु सेवा शाखाका किसानहरुलाई निशुल्क हिउँदे घासको बीउ वितरण गरिएको छ । शाखाले एक कार्यक्रमको आयोजना गरेर व्यवसायीक तथा साधारण किसानलाई उन्नत जातका घाँसका बीउ वितरण गरेको हो ।
खजुराका व्यवसायीक तथा साधारण गरि करिब १ हजार किसानलाई बीउ वितरण गर्ने गरि बिहिबारबाट सुरु गरेको पशु सेवा शाखाका प्रमुख रत्न बहादुर शाहीले जानकारी दिए ।
पशु आहारा कार्यक्रम अन्तर्गत घाँसमा आधारित पशु पालन गरि पशु उत्पादनमा टेवा पुर्याउने भन्दै पालिकाका किसानलाई बीउ वितरण गरिएको शाहीले बताए । शाखाले किसानलाई ८० प्रतिशत घाँस र २० प्रतिशत दानामा केन्द्रित गर्न अनुरोध गरेको छ ।
बर्सिम पाँच क्वीन्टल , जै चार क्वीन्टल ५० किलो र भेज २ क्वीन्टल हिउँदे घाँसको बीउ वितरण गरिएको शाखा प्रमुख शाहीले जानकारी दिए ।
घाँस वितरणको सुरुवात गर्दै खजुरा गाउँ पालिकाका प्रमुख प्रशासकीय अधिकृत बम बहादुर केसीले व्यवसायीक रुपमा पशु पालन गर्न आग्रह गरे । पालिकाले प्रत्येक वर्ष किसानलाई उन्नत जातको बीउ वितरण गर्दै आएको छ ।
