पसलमा लागेको आगो निभाइँदै । (तस्विर : कविर अन्सारी)
नेपालगन्जको न्यूरोड स्थित दुई वटा पसलमा बिहीबार राती आगलागी भएको छ । न्यूरोड स्थित जेबी कलेक्सनमा लागेको आगोले जोडिएको न्यू सपना सपिङ्गमा पनि क्षति पुर्याएको हो । प्रत्यक्षदर्शीले दिएको जानकारी अनुसार, समयमै दमकल र प्रहरी पुगेका कारण आगलागीले वरपरका अन्य पसल जल्न पाएनन् । जेबी कलेक्सन हाउसमा पूर्णतया क्षति भएको र न्यू सपनामा पनि ठूलो क्षति पुगेको छ ।
घटना लगत्तै पुगेका नेपालगन्ज उद्योग वाणिज्य संघका अध्यक्ष नन्दलाल वैश्यले पसलको बीमा गरिएका कारण केही राहत भएको र केही राहत संघबाट सहयोग गरिने प्रतिबद्धता जनाएका थिए । ‘इन्स्योरेन्स गरेका कारण व्यवसायीलाई भएको नोक्सानीमा केही हदसम्म भएपनि राहत हुन्छ’, अध्यक्ष वैश्यले ठूलो क्षति भएकोमा दुःख व्यक्त गर्दै भने, ‘संघको आपतकालीन राहत कोषबाट पनि ५० हजारसम्म उपलब्ध गराउने व्यवस्था गरेका छौं ।’ संघका निवर्तमान अध्यक्ष कृष्ण प्रसाद श्रेष्ठले समयमै विद्युत काट्न खबर गरिएको र दमकल, प्रहरी पनि पुगेकाले न्यूरोडमा ठूलो नोक्सानी हुनबाट जोगिएको जानकारी दिए ।
