हुम्लाको कथा ‘को–हसबेण्ड’ले जापानमा एक हजार डलर नगदसहित ब्रोन्ज अवार्ड जित्न सफल भएको हो
पत्रकार गणेश पाण्डेद्वारा निर्देशित वृत्तचित्र फिल्म ‘सहायक श्रीमान’ (को–हसबेन्ड) ले जापानमा एक करोड ३० लाख रुपियाँको सहयोग प्राप्त गरेको छ ।
नेपालको बहुपति प्रथा बारेमा जानकारी गराउने गरी निर्मित को–हसबेण्डले जापानको क्युशु शहरमा आयोजित पाँचौं मेहोदो अन्तर्राष्ट्रिय युथ भिजुअल मिडिया फेस्टिबलमा एक लाख अमेरिकी डलर (एक करोड तीस लाख नेपाली रुपियाँ) फिल्म फण्डिङ प्राप्त गरेको हो ।
‘को–हसबेण्डले एक हजार डलर नगदसहित ब्रोन्ज अवार्ड पनि जित्न सफल भएको छ,’ निर्देशक पाण्डेले दैनिक नेपालगन्जसँग भने, ‘हाम्रो लागि अहिलेसम्मकै हौसला र उत्साहको खबर हो ।’ पाण्डेका अनुसार, मेहोदो महोत्सवमा १ सय २२ देशका ३५ सय ३३ वटा फिल्महरु प्रतिस्पर्धामा थिए ।
बहुपति प्रथामा आधारित ३५ मिनेटको यो डकुमेन्ट्री फिल्म कर्णाली प्रदेशको हुम्लामा छायाँकन गरिएको थियो । घरमा जति दाजुभाइ छन्, एउटै श्रीमती बिहे गर्ने संसारकै अनौठो चलन अहिले पनि नेपालका कतिपय हिमाली जिल्लामा विद्यमान छ । सोही विषयलाई निर्देशक पाण्डेले पहिलो पटक पर्दामा उतारेका छन् ।
अप्रिल १९ बाट सुरु भएको १० दिने महोत्सवको अन्तिम दिन भएको अवार्ड समारोहलाई को–हसबेण्डका निर्देशक पाण्डेले भर्चुअल माध्यमबाट सम्बोधन गरेको जानकारी दिंदै अन्तिम प्रतिस्पर्धामा को–हसबेण्डले पुरस्कार जितेको बताए ।
नेपाली डकुमेन्ट्रीले एक लाख डलरको कोष जित्नु आफैमा गर्वको कुरा हो, यो मेरो मात्र नभई नेपाल र नेपालीको लागि पनि खुसीको खबर हो ।
आगामी डकुमेन्ट्री परियोजनाका लागि फिल्म फण्डिङ दिइएको यो रकमले अर्को नयाँ डकुमेन्ट्री फिल्म दर्शकलाई पस्कन मलाई मद्दत मिल्नेछ ।
गणेश पाण्डे
निर्देशक, को–हसबेण्ड
निर्देशक पाण्डेले एक हजार डलर नगद फिल्म फण्डिङसहित ब्रोन्ज अवार्डलाई आफ्नोे करिअरको अहिलेसम्मकै ठूलो उपलब्धि ठानेको बताए । ‘नेपाली डकुमेन्ट्रीले एक लाख डलरको कोष जित्नु आफैमा गर्वको कुरा हो,’ उनले भनेका छन्, ‘यो मेरो मात्र नभई नेपाल र नेपालीको लागि पनि खुसीको खबर हो ।’ निर्देशक पाण्डेले आगामी डकुमेन्ट्री परियोजनाका लागि फिल्म फण्डिङ दिइएको जानकारी दंदै भने, ‘यो रकमले अर्को नयाँ डकुमेन्ट्री फिल्म दर्शकलाई पस्कन मलाई मद्दत मिल्नेछ ।’
विभिन्न अवार्ड जित्न सफल हुँदै आएको को–हसबेण्डले क्यानडामा पनि उत्कृष्ट डकुमेन्ट्री फिल्म अवार्ड जितेको छ । क्यानडाको नर्थबे अन्टारियोमा भएको गेटवे अन्तर्राष्ट्रिय फिल्म महोत्सवमा को–हसबेण्डले उत्कृष्ट पुरस्कार पाएको निर्देशक पाण्डेले बताए । ‘भाग्यले बाँचेकाहरु’ नामक वृत्तचित्रमार्फत चर्चा कमाएका निर्देशक पाण्डेको ‘सहायक श्रीमान’ नयाँ डकुमेन्ट्री फिल्म हो ।
यसअघि को–हसबेण्डले अमेरिका, भारत, रसिया, स्लोभाकिया लगायतका देशमा अवार्ड जितिसकेको छ । काठमाडौं अन्तर्राष्ट्रिय पर्वतारोहण महोत्सव (किम्फ) मा रिलिज गरिएको ‘को–हसबेण्ड’ले यसअघि नेपाल अन्तर्राष्ट्रिय चलचित्र महोत्सव (निफ) मा पनि उत्कृष्ट अवार्डसहित १ हजार अमेरिकी डलर जित्न सफल भएको थियो ।
निर्देशक पाण्डेले करिब चार बर्षको छायाङ्कन र रिसर्चबाट को–हसबेण्ड निर्माण गरेका थिए । साइन मिडिया प्रालिले निर्माण गरेको यो वृत्तचित्रको लेखन पनि पाण्डेले नै गरेका थिए । जसको निर्मात्री शारदा गैरे, प्रमुख सहायक निर्देशक एवं दृश्य सम्पादक ईश्वर कोइराला र सहायक निर्देशक नृपराज हमाल छन् ।
यसैगरी, इश्वर कोइराला, चन्द्रमान डंगोल, अविनाश लामा र पुकार तिमिल्सिनाले यो डकुमेन्ट्रीलाई क्यामरामा कैद गरेको को–हसबेण्डमा संगीत संयोजन संगीतकार जुगल डंगोलले गरेका हुन् ।
यसअघि पनि निर्देशक पाण्डेको बहुचर्चित डकुमेन्ट्री फिल्म ‘भाग्यले बाँचेकाहरु’ (नेपाल अर्थक्वेकः हिरोज, सर्भाइभर्स एण्ड मिराकल्स)ले पनि डेढ दर्जन अन्तर्राष्ट्रिय अवार्ड जितेको थियो ।
