नगरलाई सुपरको ड्रोन

विपद्का बेला उपयोग गर्न ड्रोन, खोज तथा २६ लाखबढीको उद्धार सामग्री प्रदान गरिएको हो

नेपालगन्ज उपमहानगरपालिकालाई विपद व्यवस्थापनजन्य सामग्री प्रदान गरिएको छ । शहरी विपद तथा भूकम्पीय पूर्व तयारी परियोजना (सुपर प्रोजेक्ट)ले ड्रोन, खोज तथा उद्धार सामग्री, सूचना प्रविधि र कार्यालय व्यवस्थापन सम्बन्धि सामग्री, अग्नी नियन्त्रण सामग्री प्रदान गरेको हो ।


आपत्कालीन कार्य सञ्चालन केन्द्रका सूचना व्यवस्थापन अधिकृत रुपन ज्ञवालीले विहीवार हस्तान्तरण गरिएको ती महत्वपूर्ण सामाग्री २६ लाख ४८ हजार मूल्य बराबरका रहेको बताए । ज्ञवालीका अनुसार, नेपालगन्जमा विपद् व्यवस्थापनका लागि काम गरिरहेको सुपरले विपद व्यवस्थापन, कार्यालय व्यवस्थापन, आगलागी नियन्त्रणका लागि अत्यावश्यक सामग्री हस्तान्तरण गरेको हो ।


विहीवार एक कार्यक्रमका बीच युनिसेफ नेपालकी आपत्कालीन विशेषज्ञ सुनिता कायस्थले नेपालगन्ज उपमहानगरपालिकाका नगर प्रमुख प्रशान्त विष्टलाई सबै सामग्री हस्तान्तरण गरिन् ।


सामग्री हस्तान्तरण कार्यक्रममा उपप्रमुख कमरुद्दिन राई, प्रमुख प्रशासकीय अधिकृत शिवप्रसाद रिजाल, विपत् समिति संयोजक समिरप्रताप सिंह लगायत उपस्थित थिए ।


नेपालगन्ज उपमहानगरपालिकाले विपद्लाई प्राथमिकतामा राखेको भन्दै नगर प्रमुख विष्टले सुपरसंगको सहकार्यपछि विपद जोखिम न्यूनीकरणका क्षेत्रमा एक कदम अघि बढेको महसूस आफूले गरेको उल्लेख गरे । उनले युनिसेफका प्रतिनिधिहरुसंगको छलफलमा सुपरसंगको सहकार्यले विपद व्यवस्थापनका क्षेत्रमा अझ गहिरो ढंगले काम गर्न सहयोग पुगेको बताए ।


त्यसक्रममा युनिसेफकी आपतकालीन विशेषज्ञ कायस्थले विपद व्यवस्थापनका लागि सुपरसंगको सहकार्यमा नेपालगञ्जले गरिरहेका गतिविधि र सचेतनाबारे नागरिकमा राम्रो बुझाई रहेको आफूले पाएको उल्लेख गरिन् । कायस्थले प्रतिकार्यमा मात्रै बजेट केन्द्रित गर्ने परम्परागत अभ्यासलाई सच्याउँदै न्यूनीकरणका लागि गरिने पूर्व तयारीमा ध्यान केन्द्रित गर्नुपर्नेमा जोड दिएकी थिइन् ।

आपत्कालीन कार्य सञ्चालन केन्द्रका सूचना व्यवस्थापन अधिकृत रुपन ज्ञवालीका अनुसार, युरोपियन युनियनको आर्थिक सहयोग तथा युएनडिपी, युनिसेफ र युएन ओमनको साझेदारी र नेपाल रेडक्रस सोसाइटीको प्राविधिक सहयोगमा सुपर प्रोजेक्ट सञ्चालनमा छ ।

नेपालगन्जको वडा नम्बर ३ र ७ मा सुपर प्रोजेक्ट सञ्चालन भइरहेको ज्ञवालीले जानकारी दिए ।

प्रतिक्रिया

प्रतिक्रिया