आगामी मंसिर ४ गते हुने प्रतिनिधि सभा र प्रदेशसभा निर्वाचनका लागि बाँकेमा ३ सय ८० मतदाता केन्द्र निश्चित गरिएको छ । निर्वाचन आयोगले १ सय ३८ मतदान स्थल र ३ सय ८० निर्वाचन केन्द्र सुनिश्चित गरेको हो ।
निर्वाचन आयोगले प्रतिनिधिसभा २६ र प्रदेश सभा ५२ उम्मेदवारलाई मतदान गर्नका लागि निर्वाचन केन्द्र र स्थल एकिन गरेको हो ।
३ लाख ३२ हजार २ सय ३१ मतदाता
आगामी मंसिर ४ गते हुने प्रतिनिधिसभा तथा प्रदेश सभा निर्वाचनका लागि बाँकेमा ३ लाख ३२ हजार २ सय ३१ मतदाता सुनिश्चित भएका छन् । नयाँ दर्ता भएका, मृतक हटाइएका तथा मतदाता नामावाली सारेकाबाट एकीन गरी उक्त नामावली सुनिश्चित गरिएको हो ।
निर्वाचन आयोगले आगामी मङ्सिर ४ गते हुने प्रतिनिधिसभा र प्रदेशसभा सदस्यको निर्वाचनका लागि एक करोड ७९ लाख ८८ हजार पाँच सय ७० मतदाताहरुको अन्तिम नामावली स्वीकृत गरेको छ । निर्वाचन घोषणा भएको गत साउन १९ गतेसम्म मतदाता नामावलीमा नाम दर्ता गरी निर्वाचन हुने अघिल्लो दिन मङ्सिर ३ गतेससम्ममा १८ वर्ष उमेर पूरा हुने ८८ लाख ४७ हजार पाँच सय ७९ महिला, ९१ लाख ४० हजार आठ सय छ पुरुष र एक सय ८५ जना अन्य गरी उक्त सङ्ख्यामा मतदाता नामावली आइतवार स्वीकृत गरेको हो ।
गत वैशाख ३० गते भएको स्थानीय तहको निर्वाचनमा एक करोड ७७ लाख ३३ हजार सात सय २३ मतदाता रहेका थिए । आयोगका प्रवक्ता शालिग्राम शर्मा पौडेलले जारी गरेको विज्ञप्ति अनुसार, आयोगले १० हजार आठ सय ९१ मतदान स्थल र सोअन्तर्गत २२ हजार दुई सय २६ मतदान केन्द्रहरु रहने गरी स्वीकृत गरेको उल्लेख छ । आयोगका अनुसार सबैभन्दा बढी मतदाता रहेका जिल्लाहरु मोरङ, झापा र काठमाडौँ छन् भने सबैभन्दा कमतर्फ क्रमशः मनाङ, मुस्ताङ र डोल्पा रहेका छन् ।
