कुबेरजंग शाही
सिद्धार्थ युथ स्पोर्ट्स क्लबले खुल्ला फुटबल प्रतियोगिता आयोजना गर्ने भएको छ । आज बिहीबारदेखि बैशाख १० गते सम्म आयोजना हुने प्रतियोगिताको उद्घाटन युवा तथा खेलकुद मन्त्री महेश्वर गहतराज (अथक)ले गर्ने तय गरिएको छ ।
प्रतियोगितामा बाँकेका स्थानीय तथा बर्दिया, सुर्खेत, दाङ र सुदूरपश्चिमका फुटबल टिमहरु सहभागी हुनेछन् । स्थानीय स्तरमा रहेका खेलाडीहरुलाई राष्ट्रिय र अन्तर्राष्ट्रिय स्तरका खेलाडीसंग एकै मन्च प्रदान गर्न प्रतियोगिता आयोजना गर्न लागेको सिद्धार्थ युथ स्पोर्ट्स क्लबका सचिव लोकेन्द्र रानाले जानकारी गराएका छन्, ‘स्थानीय स्तरमा लुकेका प्रतिभाहरुलाई उच्च स्तरमा खेल्ने अवसर प्रदान गर्न तथा फुटबल खेललाई प्रवद्र्धन गर्ने उद्देश्य राखेर प्रतियोगिता सुरुवात गरेका हौँ । प्रतियोगितालाई एक पटक मात्र हैन बर्षेनी निरन्तरता दिने सोचका साथ अघि बढेका छौँ’, उनले भने ।
प्रतियोगिताको विजेताले १ लाख ५ हजार रुपैयाँ, उपविजेताले ७५ हजार रुपैयाँ प्राप्त गर्नेछन् भने व्यक्तिगत विधामा उत्कृष्ट प्रदर्शन गर्ने खेलाडीहरुलाई समेत आकर्षक पुरस्कारको व्यवस्था गरिनेछ । खुल्ला फुटबल प्रतियोगिताको आयोजना कोहलपुर नगरपालिका वडा न. २ मा रहेको कृष्ण मा.बि को मैदानमा खेल हुनेछ ।
