नेपालगन्जमा वायुयान संग्रहालय (एयरक्राफ्ट म्युजियम) स्थापना हुने भएको छ । सुदूरपश्चिम प्रदेशको राजधानी धनगढीमा बैकल्पिक गन्तव्यका रुपमा आकर्षण बनिरहेको उक्त वायुयान संग्रहालय नेपालगन्ज सारिएको हो ।
वायुयान संग्रहालय क्याप्टेन बेद उप्रेतीले आन्तरिक तथा बाह्य पर्यटक आकर्षित गर्ने उद्देश्यले ९ वर्षअघि धनगढीमा स्थापना गरेका थिए । ‘अब नेपालगन्ज –१२ को बेलासपुरमा उक्त वायुयान संग्रहालय राखिंदै छ । ‘माघको पहिलो साता उद्घाटन गर्ने गरि सञ्चालन तयारीमा रहेको चिल्ड्रेन पार्कमा म्युजियम राखिएको हो,’ नेपालगन्ज उपमहानगरपालिका वडा नम्बर १२ का वडाध्यक्ष बुद्धिसागर सुवेदीले दैनिक नेपालगन्जसँग भने, ‘१० वर्षका लागि सम्झौता गरेर चिल्ड्रेन पार्कको सुन्दरता र आकर्षण बढाउन म्युजियम राखिएको हो ।’
धनगढीमा म्युजियम राखिएको जग्गाको सम्झौता अवधि सकिएको र अर्को ठाउँमा राख्नका लागि जग्गा नपाएपछि म्युजियमलाई नेपालगन्ज ल्याइएको क्याप्टेन उप्रेतीलाई उद्धृत गर्दै वडाध्यक्ष सुवेदीको भनाइ छ । ‘धनगढीमा राम्रो को–अपरेट भएनछ, हामीले आफन्तमार्फत थाह पाएपछि नेपालगन्जका लागि राम्रो हुने ठानेर पहल लिएका हौं,’ वडाध्यक्ष सुवेदीले भने, ‘मासिक न्यूतत्तम भाडामा १० वर्षका लागि सम्झौता गरिएको छ ।’
झन्डै डेढ करोड रुपैयाँ लगानीमा ९ वर्षअघि स्थापना गरिएको वायुयान संग्रहालयका लागि काम भइरहेको छ । त्यसका लागि त्यतिबेलानै ग्राउन्डेड अवस्थामा रहेको कस्मिक एयरको फोकर–१०० विमानलाई म्युजियम बनाइएको थियो । उक्त विमानका सामान नेपालगन्ज ल्याइसकिएको छ । वायुयान संग्रहालयमा विमान अविष्कारक राइट दाजुभाइले तत्कालीन समयमा निर्माण गरेका विमान तथा आधुनिक समयमा निर्मित पाइलटरहित अत्याधुनिक विमानका ड्रोन मोडेलहरू राखिनेछन् ।
वायुयान संग्रहालयका लागि विमानका सामानहरु ल्याइएपछि हेर्नेहरुको लर्काे बेलासपुरमा देखिन्थ्यो । खासगरि बालबालिकाको संख्यानै निर्माणाधिन चिल्ड्रेन पार्कमा बढिरहेको देखिन्छ । नेपालगन्जका नगर प्रमुख डा. धवल शम्शेर राणाको सहमतिमा वायुयान संग्रहालयका लागि करिब ७ कठ्ठा जग्गा प्रयोग गर्न दिइएको हो ।
