बाँकेमा बुधबार भएको दुई छुट्टाछुट्टै दुर्घटनामा एकको मृत्यु हुनुका साथै पाँच जना घाइते भएको छ ।
बाँकेको राप्तीसोनारी–८ मा कोहलपुरतर्फ आउँदै गरेको बा १८ च ३६८३ नम्बरको टाटा सुमो र विपरित दिशाबाट जाँदै गरेको ना ५ ख ९७८० नम्बरको ट्रक जुध्दा एकको मृत्यु हुनुका साथै दुई जना घाइते भएको ट्राफिक प्रहरी कार्यालय बाँकेले जानकारी दिएको छ । प्रहरीका अनुसार सुमो चालक विनोद पाण्डे र नेपालगन्जकी व्यवसायी बिन्दु मगर घाइते भएका हुनु । नेपालगन्ज मेडिकल कलेजमा उपचार भैरहेको मगरको अवस्था हाल खतरामुक्त रहेको छ । घटनामा टाटा सुमोमा सवार संगीता मगरको अस्पतालमा उपचारको क्रममा मृत्यु भएको छ ।
त्यस्तै, नेपालगन्ज राँझामा चोकमा भे १ ब १७२१ नम्बरको मोटरसाइकल र लु ४९ स ६२३१ को मोटरसाइकल आपसमा जुध्दा दुवै मोटरसाइकलका चालक गम्भीर घाइते भएका छन् । दुर्घटनामा नेपालगन्ज उपमहानगरपालिकाका सरसफाई शाखा प्रमुख अशोक केसी र मान बहादुर शाही गम्भीर घाइते भएका हुन् । उनीहरुको अस्पतालमा उपचार भैरहेको छ । मोटरसाइकलमा सवार बर्दियाका गोपाल काफ्ले पनि घाइते भएको प्रहरीले जानकारी दिएको छ ।
