कोरोना भाइरस संक्रमणपछि क्वारेन्टाइनमैं ज्यान गुमाएका युवकको परिवारलाई घर बनाउन अभियान थालिएको हो
कोरोना भाइरस संक्रमणका कारण क्वारेन्टाइनमैं ज्यान गुमाएका बाँके नरैनापुर नयाँबस्तीका युवकको घर बनाउन अभियान थालिएको छ ।
गत शनिवार कोरोना कहर माथि अभावको बज्रपात शिर्षकमा दैनिक नेपालगन्जले मुख्य प्राथमिकतामा प्रकाशित गरेको भोला महतको स्थलगत स्टोरीपछि उक्त अभियान थालिएको हो । राहत वितरणका लागि विहिबार नरैनापुर नयाँबस्ती पुगेका नेपालगन्ज मेडिकल कलेजका सहायक निर्देशक डा. नितेष कुमार कनोडियाले घर बनाउने अभियानलाई एक लाख रुपैयाँ सहयोग गर्ने घोषणा गरेका छन् ।
यो अभियानमा अरुलाई पनि सहयोग गर्न आग्रह छ, डा. कनोडियाले सबैले मिलेर सहयोग गर्ने हो भने छिटै घर निर्माण गर्न सकिने धारणा राखे ।
इन्सेक प्रदेश कार्यालय नेपालगन्जका प्रमुख भोला महतले डा. कनोडियाको घोषणाले घर बनाउन अभियानलाई उर्जा मिलेको बताए । हामी यो अभियानमा सक्दो सहयोगका लागि आव्हान गरेका छौं, महतले दैनिक नेपालगन्जसँग भने ।
नरैनापुर गाउँपालिकाका अध्यक्ष इस्तियाक अहमद शाहले पीडित परिवार निकै विपन्न रहेकोले काज क्रियाका लागि गाउँपालिकाबाट तत्काल ५० हजार रुपैयाँ दिन थालिएको बताए । घर बनाउने अभियानमा आफुले पनि आफ्नो व्यक्तिगत तर्फबाट ५० हजार रुपैयाँ सहयोग गर्ने प्रतिबद्धता जनाए ।
