फेला परेका सार्वजनिक तथा ऐलानी जग्गामा विभिन्न योजना बनाउँदै वडा
रुपा गहतराज
नेपालगन्ज उपमहानगरपालिका रहेको सार्वजनिक तथा ऐलानी जग्गा संरक्षण गर्दै उपमहानगरपालिकाले विभिन्न कार्यका लागि प्रयोग गर्ने प्रक्रिया अगाडि बढाएको छ । उपमहानगरपालिकाले खाली तथा कब्जा गरिएका सार्वजनिक जग्गालाई खाली गराएर संरक्षण गर्ने कार्य अगाडि बढाएको हो ।
नेपालगन्ज उपमहानगरपालिका वडा नं. १२ले सार्वजनिक जग्गामा सभाहल, चिल्डे«नपार्क, फुटसलको योजना बनाएको छ । वडाले बाटो ग्राभेल समेत गरिरहेको वडा नं. १२ का वडाध्यक्ष बुद्धि सागर सुवेदीले जानकारी दिए । उनले सार्वजनिक तलाउ, मन्दिर तथा खाली जग्गाहरुलाई संरक्षण गर्दै योजना सुरु गरिएको जानकारी दिए ।
उपमहानगरपालिकाको बोर्ड बैठकले नगर क्षेत्रमा रहेका ऐलानी जग्गा पहिचान गरी संरक्षण गर्ने निर्णय गरेको थियो । पहिचान भएको जगााहरुलाई तारबार गरेर संरक्षण गरिएको वडा नं १८ का वडाध्यक्ष दिपक बर्माले जानकारी दिए । उनले चिल्ड्रन पार्क लगायतका उपमहानगरको सुझावका अनुसार काम भइरहेको भन्दै पोखरी तलाउका जग्गाहरु संरक्षणको काम भएको बताए । खाली जग्गामा संरक्षण गर्न चुनौती नभएपनि कब्जा गरी बसेका जग्गालाई संरक्षण गर्नु चुनौती रहेको बर्माको भनाइ छ ।
‘पहिचान भएका ऐलानी जग्गा तारबार गरि संरक्षण गरिएको छ’, नेपालगन्ज उपमहानगरपालिका वडा नं १०का अध्यक्ष बिन्दु भुषण बस्नेतले भने । नेपालगन्ज–२० मनिकापुरस्थित आदर्श उच्च माविको जग्गामा एक बिगा जग्गा संरक्षण गरिएको वडा नं २० का अध्यक्ष कृष्ण कार्कीले जानकारी दिए । उनले भने, ‘राँझा चोकमा रहेको एक बिगा जग्गामा प्रादेशिक क्षयरोग अस्पताल बनाउने योजना रहेको छ ।’
‘सार्बजनिक जग्गा तथा वास्तविक जग्गा कति थियो र हाल कति व्यक्तिले उक्त जग्गा कब्जा गरेर बसिरहेका छन् भन्ने तथ्यांक निकाल्ने तयारी भइरहेको छ’, उपमहानगरपालिकाका प्रेस सल्लाहकार शुक्रऋषि चौलागाईले भने, ‘संरक्षणको काम तिव्र रुपमा अगाडि बढेको छ ।’ ‘ऐलानी जग्गा कब्जा गरेर बसेकालाई खाली गराइयो,’ संरक्षण पश्चात वडाको आवश्यकतालाई ध्यानमा राखेर पूर्वाधार बनाइने नेपालगन्ज उपमहानगरपालिकाका उपप्रमुख उमा थापा मगर बताइन् ।
उपमहानगर–पालिकाका नापी शाखाका पवनदेब अर्यालले सुरुमा जग्गा पहिचान गरी भूमि अतिक्रमण गर्नेलाई हटाउने काम भएको तथा दोस्रो चरणमा भौतिक संमरचना निर्माण कार्य सुरु भएको जानकारी दिए ।
वडा नं १४ को भवानियापुरमा संरक्षणको काम भएको तथा वडा नं २२ मा कान्जि हाउस निर्माण, वडा नं २० मा विद्यालयको जग्गा संरक्षण गरेर पहल भइरहेको छ । सल्यानीबागमा रहेको सार्वजनिक जग्गामा चिल्ड्रन पार्क निर्माण गरिएको छ ।
