जिल्ला प्रहरी कार्यालय बाँकेले शुक्रबार पत्रकार सम्मेलन गरेर बिहीबार पुष्पलाल चोकमा बम राख्ने व्यक्तिलाई पक्राउ गरेको छ । प्रहरीले प्रदीप वली ‘दयालु’लाई बम राखेको आरोपमा पक्राउ गरेको हो । पत्रकार सम्मेलनमा प्रहरीले उनीसँग बरामद भएका सामानहरु समेत सार्वजनिक गरेको थियो ।
बिहीबार दिनभर नेपालगन्जलाई आतंकित बनाउने गरी पुष्पलाल चोकमा बम राख्ने व्यक्तिलाई बाँके प्रहरीले २४ घण्टा नबित्दै फन्दामा पारेको हो । सुरक्षास्रोतका अनुसार, घटनापछि चारैतिर प्रहरी परिचालन गरेको जिल्ला प्रहरी कार्यालय बाँकेले बिहीबार राती नै कमाण्डो गु्रपका नाममा आतंक मच्चाउने व्यक्तिलाई फन्दामा पारेको हो ।
‘जिल्लाका चारै नाकाबाट कर्डन एण्ड सर्च अपरेशन गरेको प्रहरीले आशंकित धेरै व्यक्तिहरु बीचबाट बम राख्नेलाई नियन्त्रणमा लिन सफल भएको हो’, सुरक्षा स्रोत भन्छ । बिहीबार विहान ९ बजे तिर राखिएको बम नेपाली सेनाले ४ बजेतिर डिष्पोज गरेको थियो ।
