समाचारदाता
दैनिक नेपालगन्ज
पूर्व राजा ज्ञानेन्द्र शाह आज बुधवार नेपालगन्ज आउँदै छन् । ‘जन्मोत्सव लगायतका कार्यक्रम लिएर उहाँ नेपालगन्ज आउन लाग्नु भएको हो’, दरबार निकट मानिएका राप्रपाका युवा नेता ऋषिराज देवकोटाले दैनिक नेपालगन्जसँग भने, ‘स्वागतका लागि औपचारिक समिति नै बनाइएको छ ।’
नेपालगन्जमा पूर्व राजा ज्ञानेन्द्रको जन्मोत्सव औपचारिक रुपमै मनाउन लागिएको छ । आगामी शनिबार आफ्नो जन्मोत्सव नागरिक स्तरमै मनाउने भएपछि पनि पूव राजा ज्ञानेन्द्रले नेपालगन्जलाई प्राथमिकतामा राखेका हुन् । ‘जन्मोत्सव नागरिक मूल समारोह समिति गठन गरिएको छ’, देवकोटाले भने ।
नेपालगन्ज–२ का भुवन कृष्ण श्रेष्ठको संयोजकत्वमा नागरिक मुल समारोह समिति गठन गरिएको हो । ‘पूर्वराजालाई विमानस्थलबाट नै भव्य स्वागत, सम्मान सहित नेपालगन्ज ल्याइनेछ’, देवकोटाले भने ।
पूर्वराजाको ७२ औ जन्मउत्सब मनाउनका लागि नेपालगन्जमा बिभिन्न उपसमितिहरु समेत गठन गरिएको नागरिक मुल समारोह समितिका महासचिब भिम बहादुर शाहीले जानकारी दिएका छन् । पूर्व राजा नेपालगन्जको होटल सोल्टीमा बस्ने भएका छन् । ‘त्यही जन्मोत्सव मनाइनेछ’, नागरिक मूल समारोह समितिले भनेको छ । त्यसक्रममा पूर्वराजा ज्ञानेन्द्रले राजनीतिक, धार्मिक र सामाजिक भेटघाट समेत गर्दैछन् ।
