सहकारीकर्मी सम्मानित
दैनिक नेपालगन्ज
प्रदेश ५ का भूमि व्यवस्था, कृषि तथा सहकारी मन्त्री आरती पौडेलले काम नगरी ‘कागजी घोडा चढ्नेलाई कारवाही गर्ने’ चेतावनी दिएकी छन् । मंगलबार राष्ट्रिय सहकारी दिवसको एउटा भव्य कार्यक्रममा बाँके जिल्लाका अगुवा सहकारीकर्मीहरुलाई सम्बोधन गर्दै मन्त्री पौडेलले राम्रो सहकारी र किसानलाई सहुलियत ऋणको व्यवस्थामा आफु लागि पर्ने प्रतिबद्धता पनि जनाइन् । जिल्ला सहकारी संघ बाँकेले राष्ट्रिय सहकारी दिवसको अवसर पारेर कार्यक्रमको आयोजना गरेको हो ।
कार्यक्रममा प्रमुख अतिथि सहकारी मन्त्री पौडेलले जिल्लाका झण्डै १ हजार सहकारी अभियन्ताहरुलाई सम्बोधन गर्दै भनिन्, ‘बाँके जिल्लालाई प्रदेश ५ को नमूना जिल्ला बनाउन तपाईहरुले गरेको प्रयासमा मेरो पूर्ण सहयोग र समर्थन रहनेछ ।’ मन्त्री पौडेलले देशमा समृद्धिको नारा घन्किरहेकाले कृषि क्षेत्रको विकास अपरिहार्य भएको भन्दै त्यसका लागि प्रत्येक किसान कहाँ सजिलै पुग्ने बाटो सहकारी नै भएकाले प्रभावकारी परिणामको अपेक्षा गरिन् ।
मन्त्री पौडेलको भनाइ थियो, ‘कृषि अब चक्लाबन्दी प्रणालीबाट मात्रै अगाडि बढाइने विधि अपनाइनेछ ।’ काम गर्ने युवाहरुलाई विदेश जान रोक्ने र किसानहरुलाई संगठित गर्दै सेयर सदस्यता वितरण गर्दै वचतकर्ताको लगानी सुरक्षा गर्न सक्ने सहकारीलाई राहत अनुदान प्रदान गरिने मन्त्री पौडेलको आश्वासन थियो । ‘कागजी घोडामात्र चढ्ने सहकारीलाई कालो सूचिमा राखेर कारवाही गरिनेछ’, मन्त्री पौडेलले कृषिका लागि इजरायलबाट धेरै कुरा सिक्न सकिने तर्क गर्दै भनिन्, ‘कृषि सहकारीहरुलाई विशेष प्राथमिकतामा राखेर प्रवद्र्धनको नीति लिइनेछ ।’
त्यसअघि जिल्ला सहकारी संघका अध्यक्ष प्रेम सुवेदीले नेपालको सहकारी आन्दोलन ‘आर्थिक समृद्धिको अभियान’ का रुपमा चर्चा गरे । अध्यक्ष सुवेदीले जिल्लामा रहेका झण्डै ४ सय सहकारीले पुर्याएका योगदानहरु बारे बोल्दै भने, ‘अबका दिन राष्ट्रिय समृद्धिको यात्रामा ऐक्यबद्धता जनाउँदै अगाडि बढ्नु पर्नेछ ।’
एक सहकारी, एक उत्पादनको नारा लिएका अध्यक्ष सुवेदीले जिल्ला सहकारी संघ मार्फत आवश्यक सहजीकरण गर्ने प्रतिबद्धता जनाउँदै भने, ‘सहस्राब्दी लक्ष्यमा सहयोग पुर्याउन, भोकमरी अन्त्य र गरिबी विरुद्धको संघर्षमा सहकारीहरुले ठूलो योगदान पुर्याउन सक्नेछन् ।’ त्यसका लागि जिल्लामै प्रत्येक सहकारीले उत्पादनसँग जोडिने लक्ष्य अघि सार्दै त्यसका लागि आफुले बनाएका योजना सुनाए । ‘गोठदेखि ओठसम्म’ अध्यक्ष सुवेदीले प्रत्येक सहकारीकर्मीलाई उत्पादनसँग जोडिन प्रेरित गर्दै भने, ‘आलीदेखि लालीसम्मका लक्ष्य हामी निर्धारण गरेर अगाडि बढ्न सक्छौं ।’
राज्य पुनर्संरचनाको पछिल्लो अवस्थाले नियमनकारी निकाय नरहेको अनुभूति गर्दै अध्यक्ष सुवेदीले भने, ‘सहकारीहरु अन्योलमा छन्, हाम्रो नियमन र सहजीकरण कसले गर्ने ?’ अध्यक्ष सुवेदीले कार्यक्रमका प्रमुख अतिथि प्रदेश ५ का सहकारी मन्त्री आरती पौडेललाई लक्षित गर्दै भने, ‘भारतीय सहकारीहरुलाई खुलेआम नेपाल आएर पैसा उठाइरहेका छन्, त्यसलाई प्रतिबन्ध लगाउन उपयुक्त कदम चाल्नु पर्यो ।’
सभाहलमा भ्याइनभ्याइ सहकारीकर्मीहरुको उपस्थिति तर्फ देखाउँदै संघका अध्यक्ष सुवेदीले निस्वार्थ भावले संगठित सहकारी अभियन्ताहरुलाई राज्यले प्रोत्साहनको नीति लिनुपर्ने सुझाए । उनले बाँके जिल्लामा कम्तिमा ५ हजार जना अट्ने सभाहलको खाँचो पनि आफ्नो वक्तव्यका क्रममा औंल्याए ।
अध्यक्ष सुवेदीका अनुसार, १० अर्ब भन्दा बढी बचत परिचालन भैरहेको बाँकेमा १ लाख ४१ हजार सेयर सदस्य सहकारीमा संगठित भैसकेका छन् । ५३ प्रतिशत महिला संगठित सहकारीमा १ हजार ६ सयलाई प्रत्यक्ष रोजगारी, २३ हजार स्वरोजगारी सिर्जना गरेको सहकारीले बाँकेमा उद्यमी सहकारी संस्था मार्फत मासिक २ हजार पाँच सय खसी जिल्लाबाट बाहिर पठाइने गरेको अध्यक्ष सुवेदीले जानकारी दिए ।
कार्यक्रममा होलिका बचत तथा ऋण सहकारी संस्था, गुरुकुल बचत तथा ऋण सहकारी संस्था, दिव्य बहुउद्देश्यीय सहकारी संस्था, साना किसान र शुभकामना बहुउद्देश्यीय सहकारी संस्थालाई उत्कृष्टताको सम्मान गरिएको थियो । सहकारी अभियानमा योगदान दिने वेष्टर्न बचत तथा ऋण सहकारी संस्था, गृहणी बहुउद्देश्यीय सहकारी संस्था, ज्ञान दियो, चुलिमालिका कृषि सहकारी संस्था, मध्यपश्चिम बचत तथा ऋण लगायतका सहकारी संस्थाहरुलाई प्रमुख अतिथि मन्त्री पौडेल र संघका अध्यक्ष सुवेदीले कदरपत्र प्रदान गरेका थिए ।
