नेपालगन्जन्यूज । हुलाकी राजमार्गको पुष्पलाल चोक देखि राप्तीपारीको बसपार्क क्षेत्रमा राजमार्गको चौडाइ घटाउन दबाब अघि बढेको छ ।
बसपार्क क्षेत्रको सडक थप चौडा हुनु पर्नेमा पुष्पलाल चोक देखि क्षेत्रीय विद्युत प्राधिकरण सम्मको हुलाकी सडकलाई मापदण्ड विपरीत चौडाई घटाउन संघर्ष समितिले प्रयास थालेको हो ।
तर समिति भित्रको एक पक्षले आयोजनाको पूर्व शर्त अर्थात २२ मिटर भित्र सडक र नाली निर्माण हुनु पर्ने अडान राखेको छ ।
अर्को पक्षले १४ मिटर भित्र ११ मिटर कालो पत्रे र १.५ मिटरको दरले दुबै तर्फ नाली निर्माण गर्न दबाव दिँदै आएको छ ।
निर्माण भइरहेको सडकको चौडाई ३० मिटर र लम्बाई ४४.६ किलोमिटर रहेको हुलाकी राजमार्ग आयोजनाले जनाएको छ ।
बसपार्क क्षेत्रमा यसअघि भारतीय निर्माण कम्पनीले काम थाल्ने भनिएकै बेलामा गरिएको स्थानीयहरुको समिति अहिले विवादित भएको हो ।
बसपार्क क्षेत्र भएकोले सडक बढि चौडा हुनु पर्ने सामान्य मान्यता हो’, समितिका सल्लाहकार श्यामलाल आर्यालले नेपालगन्जन्यूज संग भने, १४ मिटर मात्र चौडा हुने सडकले बसपार्क क्षेत्रमा आवत जावतमा समस्या हुन्छ ।’
२० करोड लागतमा निर्माण भइरहेको अत्याधुनिक बसपार्कका लागि समेत सडक चौडा बनाउनु पर्ने स्थानीयहरुको तर्क छ ।
घर जग्गा सडकमा जाने डरले अधिकांश स्थानीयहरु सडकको चौडाई कम गरेर लैजान दबाव बढाएका हुन् ।
समितिले पहिला २२ मिटर भित्र सडक निर्माण हुने कुरामा सहमत भएपनि अहिले आएर १४ मिटरमा सडक निर्माण गर्ने तर्क गर्नु निन्दनीय रहेको सल्लाहकार आर्यालले बताए । उनले २२ मिटर भित्रै सडक निर्माण हुनु पर्ने अडान दोहोर्याए ।
