नेपालगन्ज – सुनगाभा स्वास्थ्य सहकारी संस्था लिमिटेड नेपालगन्जले दशैको अवसर पारेर कारोबार शुभारम्भ गरेको छ । बुधबार सुनगाभा स्वास्थ सहकारी संस्था लिमिटेडले पर्वको उपलक्ष्यमा आयोजित शुभकामना आदानप्रदान कार्यक्रमसँगै कारोबारको शुभारम्भ गरेको हो ।
संस्थाको पहिलो बचतकर्ताको रुपमा सम्झना शाहलाई उपमहानगरपालिका महिला बालबालिका र सहकारी शाखा प्रमुख उपसचिव शोभा शाहले पासबुक हस्तान्तरण गर्दै संस्थाले कारोबार सुरु गरेको थियो । संस्थाको नयाँ कार्यसमितिले सुनगाभालाई उचाइमा पुर्याउने विश्वास कार्यक्रमका वक्ताहरुले लिएका थिए । बाँके जिल्लामा एउटा मात्रै स्वास्थ्य सहकारीको रुपमा रहेको सुनगाभा पृथक र फरक विशेषता बोकेको हुनाले सफल हुने कार्यक्रमका वक्ताहरुले बताएका थिए ।
सुनगाभा स्वास्थ सहकारी संस्थाको संचालक समितिका अध्यक्ष देबेन्द्र नाथ शुक्लाको अध्यक्षतामा भएको कार्यक्रममा जिल्ला सहकारी संघका सल्लाहकार तथा संस्थाका पूर्व अध्यक्ष तारा प्रसाद खत्री, नेपालगन्ज उपमहानगरपालिका महिला बालबालिका र सहकारी शाखा प्रमुख उपसचिव शोभा शाह, प्रेम सुवेदी, वीर बहादुर पुन, कौशल नेपाल, नमराज उपाध्याय, शंकर शर्मा लगायतका ब्यक्तिहरुको उपस्थिति रहेको थियो ।
