मेरो टुकी प्रज्ञालयले अभिभावकहरूका लागि सही अभिभावकत्व विषयको कार्यशाला गोष्ठी तथा अन्तरक्रिया गरेको छ । ‘नो योर चाइल्ड’ नाम दिइएको सो कार्यक्रममा बाल विशेषज्ञ डा. रोमा बोरा, फिजिसियन डा. शंकर केसी तथा काउन्सिलर एवं स्पिकर सुशीलकुमार गुप्ताले अभिभावकहरूलाई विविध विषयमा प्रशिक्षण दिएका थिए ।
कार्यक्रममा डा. बोराले अभिभावकलाई पोषण तथा खोप विषयमा केन्द्रित रहेर यिनका विषयमा विद्यमान रहेका मिथक, भ्रान्त धारणाबारे जानकारी दिंदै सही अभिभावकत्वका विषयमा चर्चा गरेकी थिइन् भने डा. केसीलेले औषधी सम्बन्धी मान्यता र मानव स्वास्थ्यबारे जानकारी दिएका थिए । प्रश्नोत्तर सत्रमा दुवै चिकित्सकले अभिभावकका थुप्रै जिज्ञासाहरू समाधान गरेका थिए ।
सही अभिभावकत्वसम्बन्धी दोस्रो सत्रमा काउन्सिलर तथा स्पिकर सुशीलकुमार गुप्ताले बालबालिकामा हुने मल्टिपल इन्टेलिजेन्स (बहु बौद्धिक क्षमता)बारे अभिभावकलाई प्रशिक्षण दिएका थिए । बालबालिकाको जन्मजात प्रकृति पत्ता लगाई सोहीअनुसार अध्ययन प्रवृत्ति र विशेष क्षमताअनुसार ‘प्यारेन्टिङ’ कसरी गर्ने भन्ने विषयमा प्रवचन तथा प्रयोगात्मक विधिद्वारा गुप्ताले अभिभावकलाई प्रशिक्षण दिएका थिए ।
मेरो टुकी प्रज्ञालयले सही अभिभावकत्वमा केन्द्रित रही विभिन्न कार्यक्रमहरूको आयोजना गर्दै आएको छ । प्रज्ञालय लगायत अन्य विद्यालयका अभिभावक समेत लाभान्वित होउन् भन्ने उद्देश्यले यस्ता विशेष प्रशिक्षण तथा कार्यशाला मासिक रूपमा आयोजना गर्ने मेरो टुकी प्रज्ञालयकी प्रमुख कल्पना शर्माले बताइन् ।
